Qaraǵandydaǵy Kenshiler kúnine arnalǵan úlken konsertte óner kórsetken álemge áıgili qazaqstandyq ánshi Dımash Qudaıbergen Qarmet kompanıasynyń Kostenko atyndaǵy shahtasyna bardy, dep habarlaıdy infohub.kz saıty.
Sapar barysynda ánshi kásiporynnyń jumysymen tanysyp, jer astyna 700 metr tereńdikke túsip, personaldyń ornalasýyn naqty ýaqyt rejıminde baqylaýǵa múmkindik beretin pozısıalaý júıesiniń jumysyn kórdi.
«Qaraǵandydaǵy Kenshiler kúnine arnalǵan úlken konsertten keıin (shamamen 250 myń adam jınaldy) Qarmet kompanıasynyń Kostenko atyndaǵy shahtasynda boldym. Jer astyna 700 metr tereńdikke túsip, shahterlerdiń qandaı jaǵdaıda jumys isteıtinin, bul qanshalyqty qıyn ári jaýapty eńbek ekenin óz kózimmen kórdim. Maǵan shahtanyń jumysyn, adamdardyń jer astyndaǵy ornyn baqylaýǵa múmkindik beretin zamanaýı qaýipsizdik jáne pozısıalaý júıelerin kórsetti. Shahtalardyń jańǵyryp jatqany qýantady. Biraq eń bastysy — shahterlermen júzdesip, olardy kásibı merekemen quttyqtaý múmkindigi boldy. Bul mamandyq ıelerine zor qurmet. Sizderdiń eńbekterińiz erekshe qurmetke laıyq! Kenshiler kúni qutty bolsyn! Myqty densaýlyq, amandyq jáne qaýipsiz aýysymdar tileımin! Rahmet, Qarmet!» — dedi ánshi.
Ánshi úshin bul sapar zamanaýı jer asty óndirisi men qaýipsizdik tehnologıalaryn ǵana emes, sonymen qatar júzdegen metr tereńdikte kún saıyn eńbek etetin adamdardyń eńbegin kórýge múmkindik boldy.
Kostenko atyndaǵy shahtaǵa barý shahterlik eńbekke jáne Qaraǵandy óńiriniń kómir salasynyń turaqty jumysyn qamtamasyz etetin adamdarǵa degen qurmettiń taǵy bir belgisi boldy.