Qazaqstandyq ánshi Dımash Qudaıbergen jankúıerlerin jańa mýzykalyq syıymen qýantty: ol túrik tilindegi ánin shyǵardy, ániniń mýzykasyn ózi jazdy, dep habarlaıdy infohub.kz.
Ártis álemniń túkpir-túkpirindegi barlyq jankúıerlerine kóp jylǵy qoldaýlary úshin alǵys bildirdi. Onyń aıtýynsha, túrik tilindegi jańa ániniń mýzykasyn ol ózi jazǵan. «Bizdi bala kezimizden ánshi óz kórermeniniń súıispenshiligine bólenýi kerek dep úıretti. Biraq maǵan bul kórermen keıde álemniń ekinshi shetinde bolatynyn eshkim aıtpady. Sondyqtan búgin meniń túrik tilindegi jańa tól ánim "Yazgı" shyǵady. Sońǵy 10 jyl boıy árqashan janymda bolǵan barlyq qymbatty jankúıerlerime rahmet. Dál sizderdiń arqalaryńda men jumysymdy jalǵastyryp kelemin. Kelesi ánimdi qaı tilde tyńdaǵylaryń keledi? Daýys berińizder, men sizderdiń tilekterińizdi estigim keledi», — dedi ánshi jankúıerlerine.
Ár elderden kelgen jankúıerler bul jańalyqqa belsendi túrde jaýap berdi. «Ádemi áýen! Biz ıspan tilinde jańa án suraımyz», «Al men taǵy túrik tilinde tyńdar edim», «Bizge qandaı tamasha syılyq», «Dımash, sen keremetsiń», «Mýzykanyń júrekte seziný úshin kedergisi, shekarasy, tili joq», — dep jazdy olar pikirlerde.