Qazaqstandyq ánshi Dımash Qudaıbergen túrik tilindegi avtorlyq ánimen jankúıerlerin qýantqannan keıin, kelesi trek josparyn ashty, dep habarlaıdy infohub.kz saıty.
Ártis Instagram-da jankúıerlerine úndeý jasap, qoldaýlary úshin alǵys bildirdi: onyń "Yazgı" áni iTunes-ta birden úsh elde — Vengrıa, Rýmynıa jáne Latvıada birinshi orynǵa shyqty. Ol bolashaq ánniń tili týraly suraǵanda, Latyn Amerıkasy, Ispanıa jáne basqa da ıspan tildi elderdegi tyńdarmandardyń erekshe belsendiligin baıqaǵanyn atap ótti.
"Men sizderdi estidim — kelesi án ıspan tilinde bolady! Men barlyq jankúıerlerimdi jaqsy kóremin jáne baǵalaımyn. Sizder — bir úlken mýzykalyq otbasysyzdar, jáne árqaısyńyz meniń júregimde erekshe oryn alasyzdar", — dep jazdy Dımash, ıspan tilindegi sózdi qosyp: "Jaqynda kezdeskenshe! Men sizderdi qatty jaqsy kóremin!".
Álemniń túkpir-túkpirinen kelgen jankúıerler bul jańalyqqa qýana qarsy aldy. "Vaý, ıspan tilindegi án! Rahmet, Dımash!", "Kelesi ándi portýgal tilinde aıtyńyzshy, ótinemin", "Qazirgi sezimimdi aıtyp jetkizýge sóz jetpeıdi. Sizdiń daýysyńyzdy ana tilimde tyńdaý, ár sózdi túsiný jáne olardyń artyndaǵy emosıalardy seziný — bul óte tereń, bul shyndyqqa janaspaıtyndaı kórinedi", "Bul keremet jańalyqtan tańǵalyp turmyn", "Sizdiń mýzykańyz qaı tilde shyrqalsa da, ol árqashan erekshe sulýlyqqa ıe bolady" — degen pikirler qaldyrdy jankúıerler.
Buǵan deıin Dımashtyń túrik tilindegi áni sheteldegi iTunes hıt-paradtarynyń joǵarǵy satylaryn jaýlap jatqany habarlanǵan bolatyn.