Dımash Qudaıbergenniń jankúıerleri onyń DIMENSIONS álemdik týryna qyzý daıyndalyp, aqparattyq jáne shyǵarmashylyq sharalar ótkizýde. Olar qazaqstandyq ánshiniń ónerin jerlesterine tanystyrýdy maqsat etken, dep habarlaıdy infohub.kz saıty.
DIMENSIONS týrynyń bastalýyna bir aıdan sál astam ýaqyt qaldy, alaıda jankúıerler súıikti ánshisin zor qýanyshpen qarsy alýǵa ázir. Qazaqstandyq ártis 18 qazanda Krakovte alǵashqy konsertin beredi. Konsert qarsańynda polák jankúıerleri eki kúndik aksıa ótkizdi. «Ashyq Krakov» baǵdarlamasynyń 10 jyldyǵyna arnalǵan pıknıkte olar qala turǵyndaryn Qazaqstanmen, Dımashpen jáne onyń ónerimen tanystyrdy. Al ekinshi kúni fan-klýb músheleri Krakýs qorǵanynan Krakovtyń Basty alańyna deıin júrip ótip, súıikti ánshisiniń aldaǵy konserti týraly aqparattyq materıaldar taratty.
Konsert qarsańyndaǵy aýqymdy aqparattyq naýqan Ispanıada da bastaldy. Dımash munda 30 qazanda óner kórsetedi. Naýqan 16 maýsymda bastalǵan. Jergilikti fan-klýb músheleriniń maqsaty — qazaqstandyq ánshiniń shyǵarmashylyǵyn keń aýdıtorıaǵa tanystyrý, sondaı-aq Dımashtyń Ispanıadaǵy ekinshi jeke konserti týraly habarlaý. Búginde naýqanǵa 150-den astam dúken men ózge mekeme qosyldy, olardyń sany artyp keledi.
Latyn Amerıkasynda da súıikti ánshisin kútýde. Ánshi 24 qarashada Chılıde konsert beredi. Konsertke bıletter satylyp ketken. Santágonyń basty kósheleriniń birindegi úlken sıfrlyq ekranda Dımashqa arnalǵan arnaıy quttyqtaý paıda boldy. Bul bastamany Dımashtyń jankúıerleriniń biriniń uly qolǵa alǵan. Anasynyń qazaqstandyq ánshiniń ónerin jaqsy kóretinin biletin jarnama salasynda jumys isteıtin jigit sıfrlyq quttyqtaý uıymdastyrýdy sheshti. Habarlama shyqqan sátte ekran aldyna chılı fan-klýbynyń ókilderi jınalyp, asyǵa kútken oqıǵanyń jaqyndaǵanyn atap ótti.
Osylaısha, aldaǵy álemdik týr Dımashtyń ár eldegi jankúıerlerin biriktirdi. Olardyń barlyǵy ánshimen kezdesýdi asyǵa kútip, jerlesterine ol týraly jáne Qazaqstan týraly aıtyp júr.