Birikken Kоróldiktiń burynǵy qarjy mınıstri Djordj Osborn Eýropalyq Odaqtyń keden odaǵyna qaıta qosylýdy usyndy. Onyń paıymynsha, bul qadam el ekonomıkasyn túzeýdiń eń jyldam joly, dep habarlaıdy infohub.kz saıty.
Ol referendým kezinde Devıd Kemeronnyń kabınetinde jumys istegen, keıin qarjy mınıstri qyzmetinen ketken. Osbornnyń aıtýynsha, Eýropalyq Odaqpen baılanysty qalpyna keltirýdiń mańyzy zor.
«Breksıt — naǵyz bylyq boldy. Brıtanıa is júzinde jartastan qulap ketti. Bul brıtan ekonomıkasyna orasan zıan tıgizdi. El burynǵyǵa qaraǵanda anyq kedeılendi», — dedi ol The Independent basylymyna bergen suhbatynda.
Breksıt referendýmynan keıin on jyl ótkende Eýropalyq Odaqqa qaıta kirý qıyn bolatynyn moıyndaǵan Osborn Eýropamen jaqyndasý ekonomıkany serpilte alady dep esepteıdi.
«Men keden odaǵyna qaıta kirer edim. Bul — óte qarapaıym is. Ol breksıt týraly pikirtalastyń bóligi bolǵan emes. Odan shyǵyp jatqanymyzdy eshkim bilgen joq, al bul saýdaǵa kúırete áser etti», — dedi ol.
Onyń sózinshe, breksıt jaqtastary keden odaǵynda bolmaýymyzdyń sebebi — Amerıkamen jasalatyn aýqymdy saýda kelisimderi dep túsindirgen. «Qazir onyń bári qıal-ǵajaıyp bolyp kórinedi», — dep qosty ol.
«Adamdar qazir Brıtanıanyń ósý máselesin qarastyrǵanda, «Qurlyqpen saýdany qalaı jandandyramyz, ınvestısıany qalaı tartamyz?» dep oılanbaı qoıa almaıtynyn túsindi», — dedi Osborn.
Ol Endı Bernemniń ornynda bolsa, keden odaǵyna qaıta kirýden nege bas tartaryn túsinbeıtinin jetkizdi. «Bul — aıtarlyqtaı aıqyn sheshim, óıtkeni ishki naryqqa (qaıta kirýden) ózgeshe, ol adamdardyń erkin júrip-turýyn qabyldaýdy talap etpeıdi. Al qazirgi Brıtanıada bul máseleni halyqqa túsindirý óte kúrdeli», — dedi ol.