«Dodo Pıssa» óziniń IT-ınfraqurylymyna jasalǵan kıberatakany resmı túrde rastady. Nátıjesinde qaskóıler klıentterdiń bir bóliginiń jeke derekterine qol jetkizgen bolýy múmkin. Bul týraly kompanıa óziniń Telegram-arnasynda habarlady, dep jazady infohub.kz saıty.

Kompanıanyń habarlamasynda bylaı delingen: «Dostar, keshe jáne búgin bizdiń IT-júıemizge kıberataka jasaldy. Aqparattyq qaýipsizdik toby mundaı jaǵdaıdyń qaıtalanbaýy úshin qoldan kelgenniń bárin jasap jatyr. Al qazir klıentterimizdiń bir bóliginiń qandaı derekteri qoljetimdi bolýy múmkin ekenin ashyq aıtqymyz keledi: aty-jóni, mekenjaılary, email, telefondary, týǵan kúnderi, tapsyrys quramy».

Sonymen qatar «Dodo Pıssa» klıentterdiń tólem derekteri shabýylǵa ushyraǵan júıede saqtalmaıtynyn, sondyqtan olar hakerlerdiń qolyna túspegenin málimdedi. «Tólem derekterin biz saqtamaımyz – olar qaýipsiz», – dedi kompanıada.

Bolǵan oqıǵa týraly Roskomnadzorǵa habarlandy. «Dodo Pıssa» málimetinshe, qaskóılerdiń júıege qoljetimdiligi buǵattalǵan, ishki tekserý jalǵasýda. Klıentterdi qorǵaý sharalarynyń biri – akkaýnttardan májbúrli shyǵý boldy.

DATASUCKERS hakerlik toby «Dodo Pıssanyń» shamamen 68 mıllıon klıenti týraly 2-3 terabaıt aqparatty, sonyń ishinde ártúrli elderdegi paıdalanýshylardyń derekteri men tapsyrys tarıhyn urlaǵanyn málimdep otyr. Bul sandarǵa táýelsiz rastaý ázirge joq, al kompanıanyń ózi zardap shekkenderdiń naqty sanyn jarıalaǵan joq.

«Dodo Pıssa» Qazaqstandaǵy paıdalanýshylardyń derekteri zardap shekti me, joq pa – ony naqtylamady. Alaıda hakerler jeli bar barlyq elderdegi klıentter týraly aqparat alǵanyn málimdep otyr.

Blue Screen servısi «Dodo Pıssanyń» qazaqstandyq paıdalanýshylaryna kompanıa atynan keletin qońyraýlarǵa, hattar men habarlamalarǵa erekshe saq bolýdy usynady. «Kúmándi siltemelerge ótpeńiz, SMS-kodtar men bank kartasynyń derekterin habarlamańyz, al akkaýnt qupıasózin aýystyrǵan jón, ásirese ol basqa servısterde de qoldanylsa», – dep keńes beredi mamandar.

Tólem derekteri bolmasa da, aty-jóni, telefony, email, mekenjaıy jáne burynǵy tapsyrystary týraly aqparat senimdi fıshıng úshin paıdalanylýy múmkin, dep atap ótti servıs.

Dodo.Brands halyqaralyq jelisi álemniń 26 elinde, sonyń ishinde Qazaqstan men Reseıde 1300-den astam pısserıa men kofehanany biriktiredi.