Qazaqstan qor bırjasynda dollar baǵamy 2024 jyldyń maýsymynan beri alǵash ret 450 teńgeden tómendedi. 14 qyrkúıektegi saýda qorytyndysy boıynsha amerıkandyq valúta 0,42%-ǵa, ıaǵnı 1,88 teńgege arzandap, 448,9 teńgege jetti, dep habarlaıdy infohub.kz saıty.
Sesıa barysynda dollardyń eń tómengi baǵasy 446,75 teńge boldy. Saýda kólemi ortasha deńgeıde – 440 mıllıon dollardy qurady. Kún qorytyndysy boıynsha ortasha ólshengen baǵam bir dollar úshin 447,94 teńge bolyp qalyptasty. Aıyrbastaý pýnktterinde dollar 450,5 teńgeden satylýda.
Qazaqstan qarjygerler qaýymdastyǵy óz sholýynda baǵamnyń turaqty dınamıkasy Ulttyq bank operasıalary aıasynda shetel valútasyna suranys pen onyń usynysy arasyndaǵy tepe-teńdiktiń saqtalyp otyrǵanyn kórsetetinin atap ótti.
Buǵan deıin Freedom Holding Corp. majorıtarlyq aksıoneri Tımýr Týrlov qazaqstandyq kapıtal naryǵynda qazirgi joǵary naqty mólsherlemeler saqtalsa, dollardyń ulttyq valútaǵa qatysty baǵamy 400 teńgeden tómen túsýi múmkin ekenin málimdegen bolatyn.