Nú-Iorktegi Kvıns aýdanynda ornalasqan, Donald Tramp ómiriniń alǵashqy tórt jylyn ótkizgen eki qabatty úı satyldy. Mámile somasy 1,93 mln dollardy qurady, satyp alýshy — atyn jarıalamaýdy ótingen jeke tulǵa, dep habarlaıdy infohub.kz saıty.
Túdor stılindegi úıdi 1940 jyly AQSH-tyń bolashaq prezıdentiniń ákesi, qurylys salýshy Fred Tramp turǵyzǵan. Mámileniń aıaqtalǵany týraly People portaly jazdy.
Aldyńǵy ıesi, qurylys salýshy Tommı Lın, qańyrap qalǵan ǵımaratty 2025 jyly nebári 835 myń dollarǵa satyp alǵan. Ol kezde nysannyń jaǵdaıy múshkil edi: qubyrlar jarylyp, ishinde zeń paıda bolǵan, al bos bólmelerdi qańǵybas mysyqtar mekendegen. Investor ıntererdi tolyq jańartyp, zamanaýı as úı ornatyp, parket edenderdi jańartyp, aýqymdy jóndeýge shamamen 500 myń dollar jumsady.
Bul turǵyn úıdiń tarıhy erekshe. 2017 jyly úı Trump Birth House LLC kompanıasyna 2,14 mln dollarǵa satylyp, keıin Airbnb platformasynda jalǵa berilgen. Sol kezde bólmelerge eks-prezıdenttiń tolyq boıly karton músini qoıylyp, onyń sýretteri bar jýrnal muqabalary ilingen. Keıinirek úıdi 2,9 mln dollarǵa satýǵa áreket jasaldy, biraq satyp alýshy tabylmaı, ǵımarat jyldar boıy qańyrap qaldy.