Dýbaı bıligi emırat turǵyndaryna kez kelgen elden, onyń ishinde Qazaqstannan týrıser shaqyrǵany úshin syıaqy tóleý baǵdarlamasyn iske qosty. "Dýbaıǵa shaqyrý" baǵdarlamasy árbir shaqyrylǵan qonaq úshin shamamen 815 dollar kóleminde syıaqy paketin qarastyrady, dep habarlaıdy infohub.kz.
"Vedomostı" basylymynyń málimetinshe, Dýbaı ekonomıka jáne týrızm departamenti (DET) baǵdarlamanyń bastalǵanyn habarlady. Túsindirilgendeı, "bastama sharttary boıynsha, 18 jastan asqan, Emirates ID-si bar turǵyndar dostary nemese týystary týraly málimetterdi olar kelgenge deıin onlaın-forma arqyly tirkeıdi. Qonaqtar Dýbaıǵa 2026 jylǵy 20 shilde men 31 qazan aralyǵynda áýe, teńiz nemese avtomobıl kóligimen kelýi kerek, sondaı-aq qoldanystaǵy týrısik vızasy nemese kelgen kezde vıza alý quqyǵy bolýy tıis".
Kelýshi kelgennen keıin júıe onyń kelgenin avtomatty túrde rastaıdy, al 72 saǵat ishinde turǵyn syıaqy paketi bar elektrondyq hat alady. Árbir nomınaldy paket shamamen 815 dollarǵa (380 myń teńgeden astam) baǵalanady. Baǵdarlama vızalardy resimdeýmen aınalyspaıdy – bul mindet qonaqtardyń ózderine júkteledi. Bastama turǵyndardy Dýbaı týraly áserlerimen bólisýge yntalandyrý jáne sonymen birge olardy qalany jaqyndary arasynda nasıhattaǵany úshin marapattaýǵa arnalǵan.
Euronews habarlaýynsha, emırat turǵyndary dostary men týystaryn shaqyra otyryp, "qonaqúılerde turý, meıramhanalarda keshki as, oıyn-saýyq bıletteri jáne taǵy basqa bonýstar ala alady". Atap aıtqanda, Meliá Desert Palm qonaqúıinde turýǵa 45 paıyzdyq jeńildik, Aquaventure akvaparkine jáne IMG Worlds of Adventure saıabaǵyna tegin bıletter, sondaı-aq ULA, Asia Asia jáne The 305 meıramhanalarynda "ekiniń baǵasyna bir" aksıalary qoljetimdi. BAÁ-de jaz mezgili dástúrli túrde joǵary temperatýraǵa baılanysty týrızm úshin tómen maýsym sanalatyny aıtylady.
Eske sala keteıik, buǵan deıin Air Astana Ormýz buǵazy men aımaqtaǵy jaǵdaıdyń nasharlaýyna baılanysty Dýbaıǵa reısterin 31 tamyzǵa deıin toqtatqan bolatyn.