Vengrıadaǵy anomaldy ystyq pen qurǵaqshylyq Dýnaıdyń rekordtyq deńgeıde tartylýyna ákeldi: Býdapeshte sý deńgeıi 23 santımetrge deıin tómendedi, bul 2018 jylǵy aldyńǵy antırekordtan 10 santımetrge tómen. Ózenniń sýy sonshalyqty tartylǵan, keıbir arna ýchaskelerinde velosıpedpen júrýge bolady, al taıaz jerlerden tarıhı artefaktiler tabylýda, dep habarlaıdy infohub.kz saıty.
Vengrıa veloklýbynyń tóraǵasy Gabor Dejó Kúrtı Býdapeshtten Vas qalasyna deıin 30 shaqyrymnan astam joldy ádette sý astynda bolatyn ýchaskelermen júrip ótti. Bul tartylýdyń eń erekshe saldarynyń biri boldy.
Vıshegrad qalasynyń mańynda qurǵaǵan taıaz jerden dóńgelek pishindi tas ıadro tabyldy. Arheologtardyń boljamynsha, bul Vıshegrad bekinisin qorshaý kezinde qoldanylǵan ortaǵasyrlyq katapýltanyń snarády bolýy múmkin. Bul nusqa rastalsa, artefaktiniń jasy birneshe júz jyldan eki myń jylǵa deıin jetýi múmkin.
Buǵan deıin Dýnaıdyń qurǵaǵan arnasynan Ekinshi dúnıejúzilik soǵys kezindegi batyp ketken keme de tabylǵan bolatyn.
Eýropalyq Copernicus baǵdarlamasynyń spýtnıktik sýretteri ózenniń bir jyl ishinde qanshalyqty ózgergenin kórsetedi: 2025 jyldyń shildesimen salystyrǵanda ıirimderde keń qumdy jaǵalaýlar paıda bolyp, keme júzýine kedergi keltirýde. Keıbir ýchaskelerde júk jáne jolaýshy kemeleri endi óte almaıdy, al Býdapeshte ózen kóligine shekteýler engizildi.
Vengrıa bıligi qurǵaqshylyqqa baılanysty tótenshe jaǵdaı rejımin jarıalady. Eldiń qorshaǵan ortany qorǵaý mınıstrliginiń málimetinshe, sý tapshylyǵy aımaqtardyń tórtten úsh bóliginde baıqalady. Sınoptıkter aldaǵy eki aptada jańbyr kútpeıdi, al aýa temperatýrasy 39 gradýsqa deıin kóterilýi múmkin.
Buǵan deıin Vengrıa 44 jyl ishinde alǵash ret eldegi jalǵyz atom elektr stansıasy «Paksh» jumysyn ýaqytsha toqtatatyny habarlanǵan bolatyn. Sebebi Dýnaı sýynyń rekordtyq tómendeýi — stansıa reaktorlardy salqyndatý úshin osy sýdy paıdalanady.