Amerıkalyq kofehana jáne ponchık jelisi Dunkin’ qazaqstandyq naryqtan ketken soń 10 jyl ótkende Almatyǵa qaıta oraldy. Qala turǵyndary Qonaev pen Gogol kósheleriniń qıylysynda jańa mekemeniń daıyndyǵy júrip jatqan jerde brendtiń mańdaıshasyn baıqap qoıǵan, dep habarlaıdy infohub.kz saıty.
Núkteniń qashan ashylatyny jáne Almaty men Qazaqstannyń basqa qalalarynda qansha mekeme paıda bolatyny ázirge belgisiz. Jeli mázirinde kofe, ponchık jáne basqa da nan ónimderi bar. Aıta keteıik, 2019 jyly brend ataýyndaǵy Donuts degen sózden bas tartyp, qysqartylǵan Dunkin’ nusqasyna kóshti.
Forbes Kazakhstan atap ótkendeı, jeli almatylyqtarǵa burynnan tanys. Shamamen 10 jyl buryn Dunkin’ ponchıkteri «Ramstor» sýpermarketterinde satylatyn. 2015 jyly Almatyda jetkizý qyzmetin iske qosýǵa áreket te jasalǵan, alaıda sol kezde jeliniń qalada óz mekemeleri bolmaǵan. Keıin ónim qazaqstandyq naryqtan joǵalyp ketti.
Brend tarıhy 1948 jyly Massachýsets shtatynyń Kýınsı qalasynda Open Kettle degen shaǵyn mekemeden bastalǵan. Onyń negizin qalaýshy Ýılám Rozenberg óz kafesinde eń suranysqa ıe taǵamdar ponchık pen kofe ekenin baıqap, 1950 jyly mekemeniń ataýyn Dunkin’ Donuts dep ózgertken. Ýaqyt óte brend álemdegi eń tanymal amerıkalyq jyldam tamaqtaný jelileriniń birine aınaldy. Kompanıa dereginshe, ol búkil álemde jylyna shamamen 2 mlrd kese kofe satady.
Buǵan deıin «Kýrsıv» eýropalyqtar Almaty mańynda 2027 jylǵa qaraı ponchık zaýytyn salatynyn jazǵan.