Ońtústik Afrıka Respýblıkasyndaǵy Dýrban qalasynyń mańynda ornalasqan úıde jappaı atys bolyp, keminde 11 adam qaza tapty. Seısenbi kúni keshke KvaMahýta eldi mekenindegi úıge qarýly adamdar basyp kirip, 14 adamǵa oq jaýdyrǵan. Polısıanyń málimdeýinshe, oqıǵa ornynda on adam qaza tapqan, tórteýi aýrýhanaǵa jetkizilgen, olardyń bireýi keıin jaraqatynan kóz jumǵan.
Polısıa qurbandardyń keıbiri zańsyz áreketterge qatysy bar dep kúdiktenip, tergeý múddesi úshin qazir bul týraly tolyq aıta almaıtynyn jetkizdi. Atystyń sebebi ázirge anyqtalmaǵanymen, quqyq qorǵaý organdary «qarsy toptar arasyndaǵy qaqtyǵysty» joqqa shyǵarmaıdy.
«Qazirgi derekterge qaraǵanda, 13 er adam men júkti dep esepteletin bir áıel úı ishinde kesh ótkizip jatqanda, úsh adam kelip olarǵa oq jaýdyrǵan», — delingen polısıa málimdemesinde. Qaza tapqandardyń qatarynda sol áıel de bar.
Oqıǵa ornynda bolǵan eNCA telearnasynyń tilshisiniń aıtýynsha, qarýly adamdar qashyp keter aldynda qurbandardyń bireýine tıesili kólikti órtep ketken. Jarıalanǵan beınejazbada órtengen kólik kórinedi.
Polısıa kúdiktilerdi ustaý úshin arnaıy izdestirý sharalaryn bastady.
Ońtústik Afrıka Respýblıkasy álemdegi eń joǵary qylmys deńgeıi bar elderdiń biri sanalady. Polısıa derekteri boıynsha, munda kúnine 60-tan astam adam óltiriledi.
Sońǵy aptalarda keminde toǵyz áıeldiń óltirilgeni, olardyń keıbiriniń denesi jol jıegine tastalǵany týraly habarlar eldegi qorqynyshty kúsheıtti.
Ótken jyly Iohannesbýrgtegi túngi klýbta bolǵan jappaı atysta toǵyz adam qaza tapqan edi.
Elde qylmystyq toptar arasyndaǵy aýmaq úshin talas, esirtki saýdasy jáne zańsyz ken óndirý jıi kezdesedi, bul qaýymdastyqtardaǵy zorlyq-zombylyqty týdyrady.
Aqpan aıynda Prezıdent Sırıl Ramafosa uıymdasqan qylmys «demokratıamyzǵa, qoǵamymyzǵa jáne ekonomıkalyq damýymyzǵa eń birinshi kezektegi qaýip» ekenin aıtyp, polısıaǵa qoldaý kórsetý úshin ásker jiberetinin málimdegen.