Telegram negizin qalaýshy Pavel Dýrov Reseıde halyqaralyq izdeý jarıalanǵan, Astanada ótken halyqaralyq jasandy ıntellekt olımpıadasynyń jeńimpazdaryna júldelerdi qaýipsiz jetkizý jolyn izdep jatqanyn habarlady. Syıaqy somasy 106,5 myń AQSh dollarynan asady, dep habarlaıdy infohub.kz saıty.
Dýrov óziniń resmı Telegram-arnasynda reseılik komanda komandalyq esepte birinshi oryn alǵanyn, al onyń týǵan qalasynan shyqqan Artem Gorohov jeke synda jeńiske jetkenin atap ótti. Ol sondaı-aq jeke esepte ekinshi nátıje kórsetken qazaqstandyq Daýjan Beketovti atap ótip, Qazaqstandy quttyqtady. «Biz uıymdastyrýshylarmen baılanysyp, kelesi aıda jeńimpazdarǵa Telegram júldelerin (106 500 AQSh dollarynan astam) qaýipsiz jetkizý úshin jumys istep jatyrmyz», — dep jazdy ol.
IOAI 2026 halyqaralyq jasandy ıntellekt olımpıadasy Astanada 2-8 tamyz aralyǵynda ótti. Oǵan 106 elden 500-ge jýyq oqýshy, tálimger jáne qazylar alqasynyń músheleri qatysty. Ortalyq Azıada mundaı deńgeıdegi jarys alǵash ret ótti.
Jeke esep qorytyndysy boıynsha birinshi oryndy Reseıden Artem Gorohov, ekinshi oryndy Qazaqstannan Daýjan Beketov, úshinshi oryndy Qytaıdan Shao Szysı ıelendi. Komandalyq esepte Reseı quramasy jeńimpaz atandy. Team Challenge aıasynda arnaıy nomınasıalarmen komandalar atap ótildi: robottar jarysyndaǵy úzdik óneri úshin Best Demonstration Award — Jańa Zelandıa, robottyń eń kreatıvti dızaıny úshin Creative Robot Design Award — Gonkong, robototehnıkada AI-native tásilderdi úzdik qoldanǵany úshin AI-Native Robotics Award — Brazılıa.
Eske salaıyq, Reseıde Dýrovqa terorıstik qyzmetke járdemdesý aıyby taǵylyp, ol halyqaralyq izdeý jarıalanǵan. FSB derekteri boıynsha, aıyptaýlar «Daıvınchık» tanysý chat-botyna qatysty. Roskomnadzor messendjer komandasyna tyıym salynǵan kontentti joıý týraly 150 myńnan astam talap jiberilgenin, biraq olar oryndalmaǵanyn, sodan keıin Dýrovtyń terrorıster men ekstremıster tizimine engizilgenin málimdedi.