Amerıkandyq akter ári mýzykant Djared Leto BBC-diń «Djared Leto: Gollıvýdtyń qara syry» atty jańa derekti fılminde aıtylǵan jynystyq zorlyq-zombylyq jáne orynsyz minez-qulyq týraly aıyptardy tolyqtaı joqqa shyǵardy, dep habarlaıdy infohub.kz saıty.
«Men ómirimde eshkimdi jynystyq zorlyqqa ushyratpadym. Bul aıyptar múldem jalǵan ári negizsiz», — dedi akter.
Fılmde tórt áıel akterdi jynystyq sıpattaǵy áreketterge kinálady. Olardyń aıtýynsha, oqıǵalar 2002-2016 jyldar aralyǵynda, olar jasóspirim kezinde, al Leto 30-40 jasta bolǵanda oryn alǵan. Aıtylǵan aıyptardyń ishinde jynystyq zorlyq-zombylyq, qorqytý, ádepsiz telefon sóılesýleri jáne kámeletke tolmaǵan qyzben jynystyq qatynas bar.
BBC dereginshe, keıbir oqıǵalardy hat almasý, fotosýretter jáne sol kezde áıelder ózderiniń basynan ótkergenin aıtqan adamdardyń kýálikteri arqyly ishinara rastaý múmkin boldy. Fılmge qatysqan taǵy birneshe áıel Letodan jynystyq sıpattaǵy qońyraýlar alǵanyn málimdedi.
Eske sala keteıik, Djared Leto Qazaqstanda eki ret — 2024 jáne 2025 jyldary konsert bergen. Bir óner kórsetýinde ol Almatydan úı satyp alýǵa qarsy emes ekenin meńzegen edi. Sondaı-aq akter Astanadaǵy bir sábıdiń qudasy bolýǵa daıyn ekenin aıtqan bolatyn.