Álemge áıgili akter ári rejıser Djekı Chan Aktaýǵa sapary kezinde qoǵamdyq qaýipsizdikti qamtamasyz etýge arnalǵan robot-ıtke qyzyǵýshylyq tanytty. Ol qurylǵyny óziniń uıaly telefonyna túsirip aldy, dep habarlaıdy infohub.kz saıty.
Mańǵystaý oblysy Qoǵamdyq komýnıkasıalar ortalyǵynyń Telegram arnasynda aıtylǵandaı, beınejazbada akterdiń robot-ıttiń jumysyn qyzyǵýshylyqpen baqylap, ony telefonyna túsirip jatqany kórinedi. Vedomstvo qoǵamdyq qaýipsizdikti nyǵaıtý úshin Qazaqstanda sıfrlyq tehnologıalar kezeń-kezeńimen engizilip jatqanyn qosymsha aıtty. Buǵan deıin mundaı robottandyrylǵan platformalar Astana men Almatyda qoldanylǵan, endi bul tájirıbe Aktaýda da júzege asyrylýda.
Mańǵystaý oblysy Polısıa departamentiniń málimetinshe, robot-ıtter qoǵamdyq oryndardy patrúldeý, jedel jaǵdaıdy monıtorıńileý jáne quqyq buzýshylyqtardyń aldyn alý úshin arnalǵan. Olar joǵary dáldiktegi kameralarmen jáne ıntellektýaldy baqylaý júıelerimen jabdyqtalǵan. Qurylǵylar naqty ýaqyt rejıminde beıneaqparatty Jedel basqarý ortalyǵyna jiberedi, bul polısıa qyzmetkerlerine oqıǵalarǵa jedel den qoıýǵa múmkindik beredi.
Sonymen qatar, robottandyrylǵan platformalar kúdikti zattardy anyqtaýǵa, tútin jáne órt belgilerin tirkeýge qabiletti, al tótenshe jaǵdaılar týyndaǵanda tıisti qyzmetterge avtomatty túrde habarlama jiberedi. Bul olardyń qoǵamdyq tártipti qamtamasyz etýde ǵana emes, azamattardyń ómiri men densaýlyǵyn qorǵaýda da mańyzdy ról atqaratynyn kórsetedi.
Eske salaıyq, birneshe kún buryn Djekı Chan «Qudaıdyń saýyty 4: Últımatým» fılminiń túsirilimine qatysý úshin Aktaýǵa kelgen jáne qala kóshelerimen avtomobıl rýlinde júrip ótken edi.