Reseılik reper Denıs Ýstımenko-Vaınshteın, sahnadaǵy aty Djıgan, derekkózderge súıensek, óz úıinde adamdardy kepilge alyp, oq atqan. Bul týraly infohub.kz saıty habarlaıdy.
Mash Telegram-arnasynyń málimetinshe, 3 shildeden 4 shildege qaraǵan túni ánshi úı qyzmetkerlerin shaqyryp alyp, qolyna qarý ustap túsinisý júrgizgen. Ol qyzmetkerlerdi qylmys jasady dep aıyptap, ómirlerin saqtap qalý úshin kinálaryn moıyndaýdy usynǵan.
Basylymnyń dereginshe, Djıgan bir qyzmetkerdi balalarǵa zorlyq-zombylyq jasady dep moıyndaýǵa májbúrlep, keıin oǵan oq atqan — er adamnyń qoly men aıaǵyna tıgen. Qalǵan qyzmetkerlerdi reper satqyndyq, aqparat taratý jáne ultshyldyq dep aıyptaǵan. Olarǵa qashýǵa múmkindik berip, oq atýdy jalǵastyrǵan. Oqıǵa 10 saǵatqa sozylǵan.
Osy ýaqyt boıy Djıgan men Oksana Samoılovanyń balalary úıde bolyp, shkafta tyǵylyp, sol kezde shetelde júrgen anasymen baılanysta otyrǵan. Kórshiler polısıany, aýyl kúzetin jáne reperdiń dostaryn shaqyrýǵa tyrysqan. Ánshi qarsylyq kórsetip, ony ustaýǵa áreket etkenderdiń bárin urǵan. Sodan keıin ony toqtatý múmkin boldy. Ol Izraıldegi ońaltý klınıkasyna májbúrli emdelýge jiberildi.
Mash Djıgannyń burynǵy áıeli Oksana Samoılova basylymmen áńgimesinde bul oqıǵanyń shynymen bolǵanyn rastaǵanyn málimdeıdi.
SHOT Telegram-arnasy qabyrǵadaǵy oqtar men oqıǵaǵa qatysýshylardyń biri alǵan jaraqat kórinetin qosymsha kadrlardy jarıalady.
Qazirgi tańda Djıgan Instagram-da ómirindegi oqıǵalarmen belsendi bólisip júr. Jarıalanymdaryna qaraǵanda, reper ıýdaızmdi zerttep júr. «Biz óz senimimizdi tańýdy maqsat etpeımiz! Iýdaızm — din emes, ol — jol, ómir salty, jaratýshymen jáne halyqpen ishki baılanys», — dep jazdy ol.