2026 jylǵy 22 shildeden bastap Eýrazıalyq ekonomıkalyq odaq pen Mońǵolıa arasyndaǵy Ýaqytsha saýda kelisimi kúshine endi. Osyǵan baılanysty syrtqy ekonomıkalyq qyzmetke qatysýshylar úshin deklarasıalaý men jeńildikterdi qoldanýdy jeńildetetin jańa keden kodtary engizildi. Bul týraly infohub.kz saıty habarlaıdy.
Eýrazıalyq ekonomıkalyq komısıanyń habarlaýynsha, Mońǵolıadan nemese EAEO-ke múshe memleketterden shyǵarylǵan jáne kelisim aıasynda Odaqtyń kedendik aýmaǵyna ákelinetin taýarlardy kedendik deklarasıalaý kezinde jańa «ME» kody qarastyrylǵan.
«Sonymen qatar, EAM nysanyndaǵy taýardyń shyǵý tegi týraly sertıfıkattyń málimetterin kórsetý úshin arnaıy «06022» kody engiziledi», — dep naqtylady EEK.
Eýrazıalyq ekonomıkalyq komısıanyń Alqasy tıisti sheshimdi 2026 jylǵy 21 shildede qabyldady. Alaıda qujat resmı jarıalanǵannan keıin 30 kúntizbelik kún ótken soń kúshine enedi.
«Sheshim kúshine engenge deıin syrtqy ekonomıkalyq qyzmetke qatysýshylar qoldanystaǵy kodtardy paıdalanýdy jalǵastyrýy qajet», — dep eskertti EEK.
Eýrazıalyq ekonomıkalyq komısıanyń málimetinshe, keden bajdaryn tóleý boıynsha jeńildikterdi kórsetý úshin «TI» kody qoldanylady. Bul kod 1.1-tarmaqshada atalmaǵan ózge preferensıalarǵa arnalǵan. Taýardyń shyǵý tegin rastaıtyn qujat retinde ýaqytsha «06999» kodyn kórsetý qajet. Bul kod ónimniń shyǵý tegine qatysty ózge qujattarǵa arnalǵan.
Eýrazıalyq ekonomıkalyq komısıada jańa kodtardy engizý syrtqy saýda operasıalarynyń esebin jeńildetýge, taýarlardy rásimdeýdi ashyq ári túsinikti etýge, sondaı-aq syrtqy ekonomıkalyq qyzmetke qatysýshylardyń qarjylyq jáne ákimshilik shyǵyndaryn azaıtýǵa kómektesetinin atap ótedi.
Eske sala keteıik, Eýrazıalyq ekonomıkalyq odaqtyń, oǵan múshe memleketterdiń jáne Mońǵolıanyń arasyndaǵy Ýaqytsha saýda kelisimi 2025 jylǵy 27 maýsymda Mınskide qol qoıylǵan bolatyn. Qujat taýarlardyń keń tizbesi boıynsha keden bajdaryn ózara tómendetýdi nemese joıýdy kózdeıdi jáne taraptar arasyndaǵy saýda-ekonomıkalyq yntymaqtastyqty odan ári damytýǵa baǵyttalǵan.