Kongo Demokratıalyq Respýblıkasynda Ebola vırýsyn juqtyrǵandar sany 7 myńnan asty, al ınfeksıa eldiń taǵy bir provınsıasyna tarady, dep habarlaıdy infohub.kz saıty.
Sońǵy derekterge qaraǵanda, aýrý jeti provınsıada 7 022 adamda rastaldy. İndetten 3 398 naýqas qaza tapty.
Býndıbýgıo vırýsynan týyndaǵan qazirgi indet Kongo tarıhyndaǵy eń aýqymdy ári eń qaýipti indetke aınaldy. Ol 2018–2020 jyldardaǵy epıdemıadan asyp túsip, álemde kólemi jaǵynan ekinshi orynǵa shyqty.
Eń aýqymdy indet 2014–2016 jyldary Batys Afrıkada bolǵan. Onda Gvıneıa, Lıberıa jáne Serra-Leonede 28,6 myńnan astam adam juqtyryp, 11 myńnan astam naýqas qaza tapty.
Ebolanyń jańa jaǵdaıy Kongonyń soltústik-batysyndaǵy Ońtústik Ýbangı provınsıasynda — ınfeksıa taraǵan oshaqtan alys jerde anyqtaldy. Bul aýmaq Kongo Respýblıkasymen jáne Ortalyq Afrıka Respýblıkasymen shektesedi.
Býndıbýgıo vırýsy seısenbide qaza tapqan 23 jastaǵy er adamnan tabyldy. Ol 10 shildede eldiń shyǵysyndaǵy Ońtústik Kıvý provınsıasynan shyǵyp, biraz ýaqyt shetelde bolǵan, keıin Kongoga oralyp, Ońtústik Ýbangıge kelgeni anyqtaldy.
«Qazirgi tańda Ońtústik Ýbangı provınsıasyndaǵy alǵashqy rastalǵan jaǵdaı boıynsha baılanysta bolǵandardy anyqtaý jumystary júrgizilýde», — delingen Kongo qoǵamdyq densaýlyq saqtaý ınstıtýtynyń esebinde.
Dúnıejúzilik densaýlyq saqtaý uıymy buǵan deıin Ebolanyń taralýyn toqtatýǵa bilikti medıkterdiń, jedel seriktesterdiń jáne qarjylandyrýdyń jetispeýi kedergi keltiretinin eskertken. İndet geografıasy keńeıgen saıyn máseleler ýshyǵa túsýde.
Buǵan deıin «Kýrsıv» Ebola epıdemıasymen kúresý úshin 5 myń medısına qyzmetkeri jetispeıtinin jazǵan.