1
Búktetilip jatqan bel
Sútke toıǵan marqadaı.
Buıra qoıý qaraǵaı
Belge bitken shalqalaı.
Sý jep qoıǵan jumyr tas
Túıir-túıir maltadaı.
Arnada ózen qylyqty
Qylmańdaǵan qalqadaı.
Taıyzǵa bitken quba tal
Moıyndaǵy alqadaı.
Jer erkesi jer mynaý,
Sher qalar ma tarqamaı?!

2
Túste tolqyn elirip,
Abyrjyp edi oınaqtaı.
Keshke tolqyn typ-tynysh,
Qabyrjyǵan qaımaqtaı.
Túste tolqyn týlap ed
Oınaqtaǵan taılaqtaı.
Keshke tolqyn tynyp tur
Qońyr ińir beıýaqtaı.
Túski tolqyn tep-tentek,
Boılaýyq, kózsiz qaırattaı.
Keshki tolqyn tuńǵıyq,
Tek qoımas tereń oılatpaı.

3
Tizilgen tolqyn - merýert
Bir-birine taǵylyp,
Shubyrǵan tolqyn shýmenen
Aǵytqan qoıdaı aǵylyp.
Kúńirengen tolqyn doldanyp,
Kópirip jarǵa qaǵylyp.
Jaǵada buıra bala tal
Tań bolyp tur ańyryp.
Tolqynǵa qarap men turmyn
Qońyr oımen qamyǵyp.
Saryarqam qaıda? Alysta!
Júrmin men munda naǵylyp?!

4
Erte kúnde Edildiń
Ertegi degen toǵaıyn,
Dúleı toǵaı ishinde
Ormanbettiń noǵaıyn.
Arqada jatqan alty alash
Ol kúnde bolǵan aǵaıyn.
Joryǵy, joly - bári ortaq,
Birge de jegen ýaıym.
Ótken aıqyn, uǵymdy,
Mynany ne dep uǵaıyn:
Dúleı toǵaı tuldanǵan,
Tanyp bolmaıdy noǵaıyn.

5
Oınap turǵan oqadaı,
Edildiń beti aq ala.
«Aq alasy ne?»- desem:
Ylǵı shańqan shaǵala.
Sýdy súıgen sary altyn
Sáýle ǵoı súıgen baǵana.
Kememiz kólbep keledi
Jibekteı jasyl jaǵaǵa.
Shókken buıra bulttaı
Astrahan jatyr saǵada.
Kórgen soń ony, oı kóshti
Ertedegi Asan aǵaǵa.

6
Asan Qaıǵy saldyrǵan
Astrahanǵa jeteıin.
Qaıǵysyz handar kúmbezin
Ádeıi attap keteıin.
Asannyń taýyp molasyn,
Soǵan taýap eteıin.
Molasyna túneıiń,
Aq batasyn kúteıin.
«Jolym qý!»- dese bolǵany,
Basqa joldy ne eteıin.
Áz Jánibek sender bol,
Men Asan bolyp óteıin!

---