Efıopıanyń túrli aımaqtarynda bılikke qarsy shaıqasyp júrgen jeti búlikshi top Addıs-Abebadaǵy úkimetti qulatý maqsatynda birikkenin jarıalady, dep habarlaıdy infohub.kz saıty.
Jańa koalısıa «Ómir súrý úshin odaq» dep atalady. Oǵan Amharadaǵy «Fano» mılısıasy, Oromo azattyq armıasy, Tıgraı halyq azattyq maıdany jáne taǵy tórt shaǵyn top kirdi.
Bul toptar Premer-Mınıstr Abı Ahmed úkimetin «soǵys, genosıd, jappaı qyryp-joıý jáne túbegeıli kedeılik» júrgizdi dep aıyptap, Efıopıa ydyraý qaýpine ushyraǵanyn málimdedi. Federaldyq bılik ázirge jaýap qatqan joq.
Efıopıa birneshe jyldan beri eń kóp halqy bar Oromo men Amhara shtattarynda qarýly qaqtyǵystarǵa tap bolyp otyr. Soltústiktegi Tıgraı aımaǵynda da shıelenis qaıta órshidi: eki jylǵa sozylǵan azamattyq soǵys júzdegen myń adamnyń ómirin qıyp, mıllıondaǵan adamdy úı-jaıynan aıyrdy.
2022 jyly Afrıka odaǵynyń bitimgershilik kelisimi sol soǵysty toqtatty. Alaıda eki tarap ta kelisimdi buzdy dep bir-birin aıyptaǵandyqtan, tolyqqandy qaqtyǵystyń qaıta bastalý qaýpi bar.
Jańa odaq Oromo, Amhara jáne Tıgraımen qatar Ogaden, Afar jáne Benıshangýl-Gýmýz aımaqtaryndaǵy toptardy da biriktirdi. Osylaısha ol Efıopıanyń 12 aımaqtyq shtatynyń jartysyn qamtıdy.
Amharadaǵy «Fano» toby Tıgraı soǵysy kezinde federaldyq kúshtermen birge shaıqasty. Biraq soǵys aıaqtalǵan soń bir jyl ótpeı-aq qarýsyzdaný týraly úkimet buıryǵyn oryndaýdan bas tartyp, federaldyq bılikke qarsy qarýly kóteriliske shyqty.
Úkimet Oromo azattyq armıasymen 2018 jyldan beri kúresip keledi.
«Ómir súrý úshin odaq» koalısıasynyń jarıalanýy Tıgraı halyq azattyq maıdany men kórshi Erıtreıa arasynda odaq quryldy degen habarlardan birneshe aı ótken soń boldy.
Abı buǵan jaýap retinde Efıopıanyń «qorǵanys qabiletine» senetinin aıtty.
«Basqalar qosylsa da, Efıopıanyń egemendigine qatysty bizde qylaýdaı qorqynysh joq», — dedi ol shildede zań shyǵarýshylarǵa.
Elde maýsymda jalpy saılaý ótti. Daýys berý qaqtyǵystar men qysym jasaý aıyptarynyń kóleńkesinde ótip, opozısıalyq partıalar az qatysqanyna qaramastan, Abıdiń «Órkendeý» partıasy parlamenttegi basym kópshiligin saqtap qaldy.
«Fano» men Oromo azattyq armıasy saılaýdy da, onyń nátıjelerin de moıyndamady. Alty mıllıon turǵyny bar Tıgraı aımaǵy saılaýǵa múldem jiberilmedi.