19 shilde túni Qazaqstanda eGov.kz portalyna, eGov Mobile mobıldi qosymshasyna jáne basqa da memlekettik elektrondyq qyzmetterge qoljetimdilik ýaqytsha shekteledi, dep habarlaıdy infohub.kz saıty.
Josparly tehnıkalyq jumystar 19 shildede saǵat 02:00-den 08:00-ge deıin júrgiziledi. «Ulttyq aqparattyq tehnologıalar» (UAT) kompanıasy ýaqytty paıdalanýshylardyń eń az belsendiligine qaraı tańdaǵanyn, osylaısha yqtımal qolaısyzdyqtardy azaıtýǵa tyrysqanyn túsindirdi.
Jumystar kezinde kelesi qyzmetter qoljetimsiz bolady: eGov.kz portaly men eGov Mobile mobıldi qosymshasy, onyń ishinde «Sıfrlyq qujattar» servısi; e-Otinish, E-license portaldary jáne Ashyq úkimet júıeleri; Qazaqstan Respýblıkasynyń Ulttyq kýálandyrýshy ortalyǵynyń (QR UKO) servısteri; «UAT» AQ qyzmet kórsetetin basqa da jobalar; ekinshi deńgeıli bankterdiń mobıldi qosymshalary jáne elektrondyq úkimet shlúzine qosylǵan basqa júıeler arqyly qoljetimdi memlekettik qyzmetter.
UAT paıdalanýshylarǵa barlyq qajetti operasıalardy aldyn ala aıaqtap, sondaı-aq tehnıkalyq jumystar kezinde qajet bolýy múmkin qujattardyń túpnusqalaryn daıyndaýdy usynady.
Kompanıada jańartý memlekettik qyzmetterdiń sıfrlyq ekojúıesiniń turaqty jáne úzdiksiz jumysyn qamtamasyz etý maqsatynda júrgiziletini atap ótildi.
Buǵan deıin CAPS Unlock taldaý ortalyǵynyń táýelsiz zertteýshisi Jannat Bóbekbaeva eGov Mobile qosymshasynyń jasandy ıntellekt kómekshisin eki tilde synap, paıdalanýshylardyń suraý tiline baılanysty aıyppuldar týraly ártúrli aqparat alatynyn anyqtady.