Túrkistan oblysynda qos qaıǵyly oqıǵa boldy: eki baýyr Syrdarıa ózeninde sýǵa batyp ketti, dep habarlaıdy infohub.kz saıty.
KTK telearnasynyń málimetinshe, oqıǵa úsh kún buryn Saýran aýdanynda bolǵan. 24 jáne 28 jastaǵy jigitter tyıym salynǵan jerde shomylǵan. Aldymen kishisi sýǵa bata bastaǵan, úlkeni oǵan kómekke umtylǵan, aqyry ekeýi de qaza tapqan. Olardyń denelerin uzaq ýaqyt taba almaǵan.
İzdestirý jumystaryn Túrkistan oblysy men Shymkent qalasynyń qutqarýshylary, polısıa qyzmetkerleri men týystary júrgizdi. Baýyrlardy kúndiz-túni sý asty tehnıkasy men drondardyń kómegimen izdedi. Aldymen 24 jastaǵy jigittiń denesi tabyldy, ony aǵys 6 shaqyrymǵa alyp ketken. Keıin onyń úlken aǵasynyń denesi de tabyldy.
«09:45-te Túrkistan oblysy TJD jedel-qutqarý jasaǵy oqıǵa ornynan 30 shaqyrym qashyqtyqta dene tapty. Qurmetti Túrkistan oblysynyń turǵyndary men qonaqtary, sýdaǵy qaýipsizdik erejelerin saqtańyzdar, jabdyqtalmaǵan jáne tyıym salynǵan jerlerde shomylmańyzdar», — dep eskertti Túrkistan oblysy TJD azamattyq qorǵanys basqarmasynyń bastyǵy Orazgeldi Dúısen.