Kóshede eki Bóshke kele jatty,
Biri bos, ekeýiniń biri zat-ty.
İshinde zaty bary jaı aıańdap,
Saldyrlap kele jatyr bosy qatty.
Adamdar daýsyn estip qorqyp-sasyp,
Yǵysyp, alystan-aq jolyn ashyp,
Júgirip shapshańyraq bara jatyr
Kósheniń ortasynan shetke qashyp.
Qur Bóshke jurtty úrkitip saldyrlady,
Kóshede qaramaǵan jan qalmady.
Buıymy kóp, dybysy joq ekinshisin
İltıpat etip eshkim ańǵarmady.

* * *
Jıylyp otyrǵan jurt muny tyndap,
Sózbaıyn sóz aıaǵyn kóp myljyńdap.
Bıligin ózderińiz aıtyńyzdar,
Bóshkeniń qaısysynyń puly qymbat?
Qur bóshke saldyry zor, baǵasy kem,
Fahamsyz qur daýryqqan adammen teń.
Alystan áldeqandaı bolsa daǵy,
Jaı-mánin, jaqyndasań, bilersiń sen.
Ekinshi tolyq Bóshke mysaly sol -
Adamdar kóp daýryqpas aqyly mol.
Sarp etpeı bosqa sózin jurtqa jarlap,
Úndemeı júrip isin isteıdi ol.
Baıqamas ony eshkim jaqyndaspaı,
İstes bop oı synasyp, aqyldaspaı.
Bóshkede ne zat baryn kim biledi
Qaqpaǵyn ıa bir jerin tesip ashpaı?!

---