Shyǵys Qazaqstan oblysyndaǵy Kýrshým ózeni mańynda júrgizilip jatqan aýqymdy jumystardyń vıdeosy áleýmettik jeli qoldanýshylarynyń alańdaýshylyǵyn týdyrdy. Jarıalanym avtory altyn óndirýshiler ózen arnasyna qaýip tóndirýi múmkin ekenin aıtady. Endi jaǵdaıdy ekologtar tekseredi... dep habarlaıdy infohub.kz saıty.
Kadrlarda aýyr tehnıkanyń ózen arnasyn bógep jatqany, orman kesilip, jol salynyp jatqany kórinedi. «Ózendi bógep tastady, ári qaraı qalaı baramyz belgisiz. Arǵy jaǵynda orman kesip, jol salyp jatyr. Qazir osy ýchaskeden qalaı ótetinimizdi kóremiz. Barlyq belgi boıynsha óte qıyn bolady. Al sizder qandaı aýqymdy ekenin qarańyzdar: altyn úshin bárin qoparyp jatyr», — deıdi vıdeo avtory.
Jarıalanymda Kýrshým ǵana emes, Qaljyr ózeni de qaýip astynda turǵany aıtylady. Kadr syrtyndaǵy daýys jumystarǵa shetel azamattarynyń qatysyp jatqanyn málimdeıdi.
Kýrshým aýdany aýmaǵyndaǵy jumystardy «GRK «VIZOL» JSHS júrgizip jatyr. Kompanıa Qystaý-Kýrshým ózeniniń alabyndaǵy Tokbýra ýchaskesinde geologıalyq barlaý jáne baǵaly metaldardy óndirýmen aınalysady. SHQO ákiminiń baspasóz qyzmetiniń málimetinshe, jer qoınaýyn paıdalanýshyda qajetti ruqsat qujattary bar. Atap aıtqanda, kompanıa I sanattaǵy obektiler úshin qorshaǵan ortaǵa emısıalarǵa ruqsatty 2021 jylǵy 26 naýryzda alǵan. Alaıda áleýmettik jelilerde paıda bolǵan beınematerıaldar jeke tekserýdi qajet etedi.
SHQO boıynsha ekologıa departamenti kompanıa qyzmetine jospardan tys tekserý júrgizýdi bastady. Mamandar ekologıalyq talaptardyń saqtalýyn jáne júrgizilip jatqan jumystardyń sý obektisine áserin anyqtaıdy. «Qazirgi ýaqytta Shyǵys Qazaqstan oblysy boıynsha ekologıa departamenti jer qoınaýyn paıdalanýshynyń qyzmetin ekologıalyq zańnama talaptarynyń saqtalýyna, júrgizilip jatqan jumystardyń sý obektisine yqtımal áseri týraly aqparatty eskere otyryp, jospardan tys tekserýdi bastady», — dedi SHQO ákiminiń baspasóz hatshysy Laýra Jaqypova.
Tekserý qorytyndysy boıynsha kompanıanyń áreketterine quqyqtyq baǵa beriledi. Eger buzýshylyqtar rastalsa, jer qoınaýyn paıdalanýshyǵa zańda kózdelgen sharalar qoldanylady. Ákimdikte jaǵdaı ýákiletti memlekettik organdardyń baqylaýynda ekenin de málimdedi. Tekserý nátıjeleri men qabyldanǵan sharalar týraly bılik qosymsha habarlaýǵa ýáde berdi.
Aıta keteıik, bul Kýrshým aýdanyndaǵy altyn óndirisi daý týdyrǵan alǵashqy jaǵdaı emes. Mysaly, 2021 jyldyń qyrkúıeginde áleýmettik jelilerde Kýrshým jáne Qystaý-Kýrshým ózenderiniń yqtımal lastanýy týraly habarlamalar taraǵannan keıin SHQO ekologıa departamenti kompanıaǵa jospardan tys tekserý júrgizgen bolatyn. Sonda mamandar jınaqtaýshy toǵandardan tehnologıalyq sýlardyń jer bederine asyp tógilýi jáne tundyrǵyshtan sýdyń Qystaý-Kýrshým ózenine aǵyzylýy faktilerin anyqtaǵan.