QR Ádilet mınıstrligi Sot saraptamasy ortalyǵy RMQK-da memlekettik satyp alý kezinde 2,5 mlrd teńge jymqyrýdy uıymdastyrdy degen kúdikti Vetnamnan Qazaqstanǵa ekstradısıalandy. Bul týraly infohub.kz habarlaıdy.
Qarjylyq monıtorıń agenttiginiń (QMA) málimetinshe, 2023–2025 jyldarǵa arnalǵan nashaqorlyq pen esirtki bıznesine qarsy kúres jónindegi keshendi jospar aıasynda sot saraptamasy organdaryn materıaldyq-tehnıkalyq jaraqtandyrý úshin respýblıkalyq búdjetten 10 mlrd teńgeden astam qarjy bólingen. Alaıda kúdikti RMQK dırektory R.Q.Satybaldıevpen, Memlekettik satyp alý departamentiniń basshysy D.B.Iskenderovamen, sondaı-aq «Mark Invest» JSHS men «Direct Services» JSHS basshysy A.A.Shıntemırovamen birigip, búdjet qarajatyn jymqyrýdy uıymdastyrǵan. Qylmyskerler jabdyq qunyn úsh esege jasandy túrde kóterip, jalǵan komersıalyq usynystar paıdalanǵan.
Sot úkimimen R.Q.Satybaldıev, D.B.Iskenderova jáne A.A.Shıntemırova kináli dep tanylǵan. Olarǵa múlkin tárkileı otyryp, 3 jyldan 8 jylǵa deıin bas bostandyǵynan aıyrý jazasy kesilgen.
2025 jyldyń naýryzynda qylmystyń boljamdy uıymdastyrýshysy halyqaralyq izdeý jarıalanǵan. Sot syrttaı qamaýǵa alý túrindegi bultartpaý sharasyn sanksıalaǵan. Aǵymdaǵy jyldyń basynda kúdikti Vetnam aýmaǵynda ustaldy. Qarjylyq monıtorıń agenttigi, Interpoldyń Ulttyq ortalyq búrosy jáne Syrtqy ister mınıstrliginiń birlesken jumysynyń nátıjesinde ustalǵan adam Qazaqstan Respýblıkasyna qaıtaryldy.
Qylmystyq is sotqa joldandy.