Saýd Arabıasynan Qazaqstanǵa terorızm nasıhattady dep aıyptalǵan 51 jastaǵy Aqtóbe oblysynyń turǵyny ekstradısıalandy. Aqtóbe qalalyq sotynda tergeý nusqasy boıynsha Saýd Arabıasynda turǵan kezinde Telegram messendjeri arqyly terorızm nasıhatynyń belgileri bar materıaldar taratqan er adamǵa qatysty qylmystyq is qaraldy, dep habarlaıdy infohub.kz saıty.
Er adamnyń 2008 jyly Almaty arqyly Saýd Arabıasyna ketip, Medınada turǵany anyqtaldy. Prokýrordyń aıtýynsha, is boıynsha jiberilgen habarlamalarda terorızm nasıhatynyń belgileri bar ekenin rastaǵan birneshe saraptama júrgizilgen.
Sotta aıyptalýshy: «Men jubaıym jáne úsh balammen birge Saýd Arabıasyna attandym. Islamdy qabyldap, bilimimdi tereńdetkim keldi. 2008 jyldan 2026 jylǵa deıin sol jerde turdym. Habarlama jibergenderdiń biri 2018 jyly Medınaǵa kelip, oqýǵa tústi. Solaı tanystyq. Ekinshi adammen Aqtóbedegi meshitte tanystym. Úshinshi adamdy esimde joq. Endi qateligimdi túsindim, shyn júrekten ókinemin. Bul mátinniń terorızmdi nasıhattaıtynyn bilmedim», — dedi.
Sonymen qatar, otyrys barysynda aıyptalýshynyń uıaly telefonynan tabylǵan, qarýly qaqtyǵystar kórinisteri túsirilgen beınejazbalar kórsetildi. İs materıaldaryna sáıkes, er adam 2019 jyly izdeý jarıalanǵan, keıin Interpol jelisi boıynsha halyqaralyq izdeýge qoıylǵan. Tergeý birneshe ret uzartylyp, is boıynsha óndiris mezgil-mezgil toqtatylyp turǵan.
Aǵymdaǵy jyly aıyptalýshy ustalyp, Qazaqstanǵa ekstradısıalandy. Aıyptalýshynyń qorǵaýshysy prosesýaldyq kelisim jasasý týraly ótinish bildirdi.