Astana turǵyndary men qonaqtaryna 25 tamyzdan bastap elektrosamokattarmen júrý erejeleriniń ózgeretini eskertildi, dep habarlaıdy infohub.kz saıty.
Astana qalasy ákimdiginiń saıtynda jarıalanǵan aqparatqa sáıkes, 2026 jyldyń 25 tamyzynan bastap elektrosamokattardyń trotýarlar men jaıaý júrginshiler joldarynda júrýine tyıym salynady. Paıdalanýshylar tek velosıped joldary men velosıped jolaqtarymen, al olar bolmaǵan jaǵdaıda — jol qozǵalysy erejelerinde kózdelgen jaǵdaılarda júris bóliginiń oń jaq shetimen nemese jol jıegimen júrýi qajet.
Astana qalasy polısıa departamenti ákimshilik polısıa basqarmasynyń bastyǵy Nurlan Ývaev elektrosamokattardyń jol qozǵalysynyń tolyqqandy qatysýshylaryna aınalǵanyn, alaıda paıdalanýshylardyń belgilengen talaptardy saqtamaýy jeke utqyrlyq quraldaryn júrgizýshilerge de, jol qozǵalysynyń basqa qatysýshylaryna da qaýip tóndiretinin atap ótti. Onyń aıtýynsha, jol qozǵalysy erejelerine engizilgen ózgerister qaýipsizdikti arttyrýǵa jáne apattylyqty azaıtýǵa baǵyttalǵan.
Polısıada júris bóliginde qozǵalǵan kezde elektrosamokat júrgizýshisiniń jasy 18-den kem bolmaýy, kez kelgen sanattaǵy júrgizýshi kýáliginiń bolýy jáne qorǵanys dýlyǵasyn kıýi qajet ekenin qosty. Qarańǵy ýaqytta jaryq qaıtaratyn elementterdiń bolýy da mindetti.
Astana qalasy prokýratýrasynyń qyzmetkerleri elektrosamokat paıdalanýshylary tarapynan eń jıi kezdesetin buzýshylyqtar — júrgizýshi kýáliginsiz júris bóligine shyǵý, jyldamdyqty asyrý, sondaı-aq qıylystardy kesip ótý kezinde talaptardy saqtamaý ekenin atap ótti. Bir samokatta jolaýshylardy tasymaldaý erekshe qaýip tóndiredi.
Eske salaıyq, 1 shildeden bastap Qazaqstanda elektrosamokattarmen júrýge qatysty jańa erejeler kúshine endi, olar jasyna, quqyqtarynyń bolýyna jáne saqtandyrýǵa qoıylatyn talaptardy engizdi. Keıin İİM 25 tamyzdan bastap elektrosamokattarǵa trotýarlarda júrýge tyıym salynatynyn habarlady.