Almatyda polısıa elektrosamokat ıelerine jol júrisi qaǵıdalaryn qatań saqtaý qajettigin eske saldy, dep habarlaıdy infohub.kz.
Qalada elektrosamokattar men basqa da jeke utqyrlyq quraldaryn qaýipsiz paıdalaný mádenıetin arttyrýǵa baǵyttalǵan profılaktıkalyq is-sharalar jalǵasýda. Aıta keteıik, elektrosamokattardyń tanymaldylyǵy artyp keledi, sonymen birge paıdalanýshylardyń jol erejesin saqtaýdaǵy jaýapkershiligi de artady.
«Elektrosamokat búginde kúndelikti júrý quralyna aınaldy, degenmen qaýipsizdik árkimniń jeke jaýapkershiliginen bastalady. Biz bir samokatta eki, tipti úsh adamnyń júrýi, úlken júk tasymaldaýy, jol júrisi erejeleriniń talaptaryn elemeý sıaqty jaǵdaılarǵa jıi tap bolamyz», — dedi Almaty qalalyq Polısıa departamentiniń profılaktıkalyq jumysty úılestirý basqarmasy bastyǵynyń orynbasary Rýstem Ábdiǵalıev.
Vedomstvoda túsindirý jumystaryna qaramastan, polısıa qyzmetkerleri jol-kólik oqıǵalaryna ákelýi múmkin buzýshylyqtardy anyqtaýdy jalǵastyryp jatqanyn habarlady. Polıseıler jeke utqyrlyq quraldaryn paıdalanýshylarmen turaqty túrde áńgimelesip, qoldanystaǵy zańnama talaptaryn túsindiredi.
«Mundaı buzýshylyqtar jol-kólik oqıǵalarynyń qaýpin edáýir arttyrady. Biz barlyq paıdalanýshylardy belgilengen erejelerdi saqtaýǵa, jol qozǵalysynyń basqa qatysýshylaryn qurmetteýge jáne qabyldanyp jatqan sharalardyń basty maqsaty – adamdardyń ómiri men densaýlyǵyn saqtaý ekenin este saqtaýǵa shaqyramyz», — dep atap ótti Rýstem Ábdiǵalıev.