Túbine bir Emenniń Shoshqa kelip,
Jemisin jerge túsken jedi terip.
Toıǵan soń kelistirip uıyqtap alyp,
Emenniń túbin qazdy tura kelip.
Shoshqaǵa sol ýaqytta sóz aıtady
Aǵashtyń basyndaǵy quzǵyn kórip:
«Tamyryn qazyp, arshyp tastaǵan soń,
Qalmaı ma Emen qýrap, keýip, synyp?»
«Qýrasa, qýraıdy dep, qınalman kóp,
Qýramaı turǵanmenen, neme ol sep?
Qýrasyn, maǵan salsa, kúıip ketsin,
Qaıǵyrman onyń úshin ýaıym jep.
Qudaıym jemisinen aıyrmasyn,
Qylatyn meni semiz solar ǵoı tek!».
Sol shaqta kúńirenip sóıledi
Emen Shoshqaǵa aıtyp turǵan osylaı dep:
«Eı, shirkin! Jaqsylyqty bilmeıtuǵyn!
Bilseń sen, ne betiń bar búı deıtuǵyn?!
Joǵary qaraı alsań, biler ediń
Shyqqanyn jemis qaıdan sen jeıtuǵyn!»

* * *
Dúnıede túrli-túrli adamdar bar,
Jaqsy men arasynda jamandar bar.
Ǵylymdy paıdalanyp otyrsa da,
Sezbeıtin sol paıdasyn nadandar bar.

---