Qazaqstan bankterindegi barlyq depozıtterdiń 40 paıyzǵa jýyǵy Almaty turǵyndaryna tıesili — olar shamamen 9,6 trln teńge jınaǵan, dep habarlaıdy infohub.kz saıty.
Jaqynda qazaqstandyq bankterdegi halyq depozıtteri rekord jańartyp, alǵash ret 30 trln teńgeden asty. Alaıda Finprom portalynyń aıtýynsha, rezıdent emesterdiń shottary men kartochkalardaǵy aqshany alyp tastasaq, soma birshama qarapaıym bolady — 24,9 trln teńge.
Bul soma óńirler boıynsha birkelki bólinbegen. Depozıtterdegi qarajattyń 40 paıyzǵa jýyǵy, ıaǵnı shamamen 9,6 trln teńge, Almaty salymshylarynda. Ekinshi orynda Astana (3,2 trln), úshinshi orynda Qaraǵandy oblysy (1,4 trln). Bestikke sondaı-aq Batys Qazaqstan oblysy (1,2 trln) men Shymkent (1,1 trln teńge) kirdi.
Depozıtterde eń az aqsha Jetisý (303,9 mlrd), Almaty oblysy (232,4 mlrd) jáne Ulytaý (168,2 mlrd teńge) turǵyndarynda saqtaýly.
Al jınaqtalǵan jalpy somany óńirlerdiń halqymen salystyratyn bolsaq, ár almatylyqqa orta eseppen 4,1 mln teńge shamasynda tıedi. Salystyrý úshin: Qazaqstan boıynsha bul kórsetkish orta eseppen nebári 1,2 mln teńgeni quraıdy. Astanada ár adamǵa 1,9 mln teńge, al Shymkentte — 803,9 myń teńge tıesili. Eń tómen kórsetkish Almaty oblysynda tirkelgen — ár adamǵa orta eseppen nebári 144,1 myń teńge.
Osylaısha, depozıtter boıynsha kóshbasshylar men aýtsaıderler arasyndaǵy alshaqtyq 25 eseden asady. Sarapshylardyń pikirinshe, bul Qazaqstan óńirleri boıynsha halyqtyń jınaq deńgeıindegi eleýli dıferensıasıany kórsetedi.
Aıta keteıik, buǵan deıin ekinshi deńgeıdegi keıbir bankter ózderiniń depozıttik ónimderi boıynsha syıaqy mólsherlemelerin tómendetken bolatyn.