2026 jylǵy maýsymda Enbek.kz elektrondy eńbek bırjasyna jumys berýshiler 108,7 myń bos oryn, al úmitkerler 126,7 myń túıindeme ornalastyrdy. Mamyr aıymen salystyrǵanda bos oryndar sany 25,4%-ǵa, túıindemeler sany 38,3%-ǵa artqan. Bul týraly infohub.kz saıty habarlaıdy.
QR Eńbek jáne halyqty áleýmettik qorǵaý mınıstrliginiń baspasóz qyzmeti platformadaǵy eńbek naryǵy mamyr merekeleri kezindegi maýsymdyq quldyraýdan keıin qalpyna kelgenin atap ótti. Jumys kúshi usynysynyń maýsymdyq artýy, sonyń ishinde oqý oryndaryn bitirýshilerdiń eńbek naryǵyna shyǵýyna baılanysty.
Salalyq suranys qurylymynda bilim berý (19,2 myń), ózge de qyzmet túrlerin usyný (16,5 myń), aýyl, orman jáne balyq sharýashylyǵy (12,1 myń), densaýlyq saqtaý jáne áleýmettik qyzmet kórsetý (9,5 myń), qurylys (8,4 myń) jáne óńdeý ónerkásibi (7,3 myń) kósh bastap tur.
Óńirlik bóliniste eń kóp bos jumys orny Túrkistan oblysynda (12,3 myń), Astanada (8,5 myń), Jambyl oblysynda (7,0 myń) jáne Qaraǵandy oblysynda (6,7 myń) jarıalanǵan.
Maýsym aıynda eń joǵary jalaqy usynylǵan bos oryndar qatarynda dıvızıon dırektory (1,98 mln teńge), basqarma bastyǵynyń orynbasary (1,38 mln teńge) jáne uńǵyma ınjeneri (1,31 mln teńge) laýazymdary erekshelenedi. Al úmitkerler arasynda eń joǵary jalaqy kútýleri ushqysh (3,4 mln teńge), júıelik arhıtektor (2,5 mln teńge) jáne hırýrg dáriger (2 mln teńge) laýazymdaryna úmitkerlerde tirkelgen.
Úmitkerlerdiń basym bóligi (49%) 35 jasqa deıingi jas sanatynda ekeni baıqalady.