Qazaqstanda jartyjyldyq qorytyndysy boıynsha jumyssyzdyq deńgeıi 4,5% boldy, al medısınalyq-áleýmettik saraptamalardyń 45%-dan astamy qashyqtyqtan júrgizilýde. QR Eńbek jáne halyqty áleýmettik qorǵaý mınıstri Asqarbek Ertaevtyń tóraǵalyǵymen keńeıtilgen alqa otyrysy ótip, onda 2026 jyldyń birinshi jartysynyń qorytyndysy shyǵarylyp, jyl sońyna deıingi mindetter belgilendi, dep habarlaıdy infohub.kz saıty.
Birinshi vıse-mınıstr Erbol Týıaqbaev eńbek quqyqtaryn qorǵaý jumysynyń nátıjeleri týraly baıandady. Onyń aıtýynsha, memlekettik ınspektorlar alty aıda 3607 tekseris júrgizgen – bul ótken jyldyń osy kezeńimen salystyrǵanda 22,6%-ǵa artyq. Baqylaý barysynda eńbek zańnamasynyń 4 myńnan astam buzýshylyǵy anyqtalyp, jumys berýshilerge 2,3 myńnan astam mindetti nusqama berilip, ákimshilik yqpal sharalary qabyldanǵan.
Vıse-mınıstr Eldar Kýzenbaev eńbek naryǵyndaǵy ahýaldy baıandady. Ol jartyjyldyq qorytyndy boıynsha elde jumyssyzdyq deńgeıi 4,5% quraǵanyn atap ótti. Onyń sózinshe, jumyspen qamtý qyzmetiniń basym baǵyttarynyń biri – memlekettik qyzmetterdiń jedeldigi men sapasyn arttyrý úshin sıfrlyq tehnologıalar men jasandy ıntellekt negizindegi sheshimderdi engizý.
Vıse-mınıstr Vıktorıa Shegaı medısınalyq-áleýmettik saraptama men áleýmettik qorǵaý júıesiniń damýy jóninde aqparat berdi. Ol MÁS-tiń qashyqtyq formaty keńeıip kele jatqanyn atap ótip, búginde saraptamalardyń 45%-dan astamy osy formatta júrgizilip jatqanyn málimdedi. Áleýmettik qorǵaý salasyndaǵy jumys keshendi túrde – zańnamany jańartý, sıfrlyq servısterdi damytý, ońaltý ınfraqurylymyn kúsheıtý jáne memlekettik baqylaýdy kúsheıtý arqyly júrgizilýde.