Qazaqstandaǵy barlyq vakansıanyń 42%-ǵa jýyǵy bilikti jumysshy kásipterine, qyzmet kórsetý salasyna jáne aýyl sharýashylyǵyna tıesili. Jumys berýshilerge qandaı mamandar kóbirek qajet ekenin Eńbek jáne halyqty áleýmettik qorǵaý mınıstrligi aıtyp berdi, dep habarlaıdy infohub.kz saıty.
Vedomstvonyń baǵalaýynsha, 2035 jylǵa deıin el ekonomıkasynyń kadrǵa degen qajettiligi shamamen 2,9 mln adamdy quraıdy. Bul rette jumysshy kásipterine erekshe kóńil bólinedi: zamanaýı óndiris qurylǵymen jumys isteı alatyn, kúrdeli tehnologıalyq operasıalardy oryndaıtyn jáne jańa óndiristik tehnologıalardy meńgeretin mamandardy talap etedi.
Enbek.kz portalynyń dereginshe, barlyq vakansıanyń 42,3%-y qyzmet kórsetý, saýda, aýyl sharýashylyǵy salasynyń mamandaryna, sondaı-aq ónerkásip, qurylys, kólik salasyndaǵy bilikti jumysshylar men qurylǵy operatorlaryna tıesili.
Jalpy eńbek naryǵyndaǵy jaǵdaıǵa kelsek, 2026 jyldyń ekinshi toqsanynda Qazaqstanda 9,4 mln adam jumyspen qamtyldy, al jumyssyzdyq deńgeıi 4,5%-dy qurady. Alaıda vedomstvo atap ótkendeı, jumyspen qamtýdyń ózindik sıpattary — jumystyń turaqtylyǵy, eńbekaqy deńgeıi, eńbek quqyqtarynyń saqtalýy jáne qaýipsizdik te mańyzdy.
«Jumyspen qamtý salasyndaǵy memlekettik saıasattyń bir baǵdary — sapaly jumys oryndarynyń sanyn kóbeıtý. Eńbek naryǵyn damytý tujyrymdamasyna sáıkes, 2029 jylǵa qaraı olardyń sanyn 3,8 mln-ǵa jetkizý josparlanýda», — dedi Eńbek mınıstrliginde.
Sapaly jumys oryndaryna jylyna keminde alty aı jumyspen qamtýdy, óńir boıynsha medıanalyq eńbekaqydan tómen emes aqy tóleýdi, qaýipsiz eńbek jaǵdaıyn jáne áleýmettik qorǵaýdy kózdeıtin oryndar jatady.
Buǵan deıin «Kýrsıv» Qazaqstan prezıdenti Qasym-Jomart Toqaevtyń qazaqstandyqtardy Eńbek kúnimen quttyqtaǵanyn jazǵan bolatyn. Ol azamattarǵa zor densaýlyq, amandyq jáne eńbekte jańa tabystar tiledi.