Qazaqstannyń Eńbek jáne halyqty áleýmettik qorǵaý mınıstrligi Enbek.kz elektrondy eńbek bırjasyndaǵy vakansıalar jáne jumys izdeýshilerdiń jalaqy boıynsha kútýleri týraly málimetterdi jarıalady, dep habarlaıdy infohub.kz.
Vedomstvonyń dereginshe, ótken aıda jumys berýshiler 108,7 myń vakansıa ornalastyrsa, jumys izdeýshiler 126,7 myń túıindeme jarıalaǵan. Salalar boıynsha suranys qurylymynda bilim berý (19,2 myń vakansıa) kósh bastap tur. Ózge de qyzmet túrlerin kórsetý (16,5 myń), aýyl, orman jáne balyq sharýashylyǵy (12,1 myń), densaýlyq saqtaý jáne áleýmettik qyzmet kórsetý (9,5 myń), sondaı-aq qurylys (8,4 myń) jáne óńdeý ónerkásibi (7,3 myń) salalarynda eleýli suranys saqtalýda.
Eń kóp vakansıalar Túrkistan oblysynda (12,3 myń), Astanada (8,5 myń), Jambyl oblysynda (7 myń) jáne Qaraǵandy oblysynda (6,7 myń) ornalastyrylǵan. Joǵary bilikti mamandar vakansıalardyń 25 paıyzynda talap etiledi. Qalǵan bóligi orta jáne tómen biliktilikti vakansıalar arasynda shamamen teń bólingen.
Jumys izdeýshilerdiń arasynda 35 jasqa deıingi úmitkerler basym (barlyq túıindemeniń 49 paıyzy), bul aldyńǵy aılarǵa qaraǵanda aıtarlyqtaı joǵary jáne túlekterdiń eńbek naryǵyna shyǵýyna baılanysty. 35-44 jas aralyǵyndaǵy úmitkerlerdiń úlesi 25 paıyz, 45-54 jas – 17 paıyz, 55 jastan joǵary – 9 paıyz. 55 paıyz jaǵdaıda jumysty áıelder izdese, 45 paıyzynda erler izdeıdi.
Maýsym aıynda eń joǵary jalaqy usynylǵan vakansıalar qatarynda dıvızıon dırektory (shamamen 1,98 mln teńge), basqarma bastyǵynyń orynbasary (shamamen 1,38 mln teńge) jáne uńǵyma ınjeneri (1,31 mln teńge) laýazymdary erekshelenedi. Jumys izdeýshiler arasynda eń joǵary jalaqy kútýleri ushqysh (shamamen 3,4 mln teńge), júıe arhıtektory (2,5 mln teńge) jáne dáriger-hırýrg (2 mln teńge) laýazymdaryna úmitkerlerde tirkelgen.
«Maýsym aıynyń derekteri platformadaǵy mamyr aıyndaǵy quldyraýdan keıin iskerlik belsendiliktiń qalpyna kelgenin kórsetedi: suranys pen usynys jyl basynan bergi eń joǵary deńgeıge jetti. Suranys qurylymy turaqty bolyp qalyp otyr – jumys berýshilerdiń negizgi qajettiligi áleýmettik salada, qyzmet kórsetý sektorynda jáne maýsymdyq salalarda shoǵyrlanǵan, al usynys tarapynan jastardyń, onyń ishinde oqý oryndaryn bitirgen túlekterdiń belsendiligi artty», — dep habarlady Eńbek jáne halyqty áleýmettik qorǵaý mınıstrliginen.
Jyl basynan beri platformaǵa 604,4 myń vakansıa jáne 736 myń túıindeme ornalastyryldy. Buǵan deıin Qazaqstan úkimeti 2026–2029 jyldarǵa arnalǵan halyqtyń tabysyn arttyrý jónindegi keshendi jospardy bekitti. Qujatta jalaqy, jumys oryndary, azyq-túlik baǵalary, salyq jeńildikteri, áleýmettik qoldaý jáne qazaqstandyqtardyń qaryz júktemesin azaıtý boıynsha sharalar kórsetilgen.