Pavlodar jáne Mańǵystaý oblystarynda jumyssyz turǵyndardy avtomatty túrde anyqtap, olarǵa jumys usynatyn júıe iske qosyldy. Pılottyq joba 59 myńnan astam adamdy qamtydy, al qarasha aıynan bastap sıfrlyq eńbek qyzmetin Qazaqstannyń basqa óńirlerine de taratý josparlanyp otyr, dep habarlaıdy infohub.kz saıty.
Platformany Eńbek kúnine oraı ótken «Eńbek – el muraty» is-sharasynda Premer-mınıstr Oljas Bektenovke tanystyrdy. Sol jerde kadrlar daıarlaý jáne óndiristegi qaýipsizdikti qamtamasyz etý, onyń ishinde jasandy ıntellekt qoldanylatyn sheshimder de kórsetildi.
Sonymen qatar úkimet jańa eńbek baǵdarlamasyn ázirlep jatyr. Ondaǵy basty nazar kásiporyndardyń suranysyn eskere otyryp kásibı oqytýǵa jáne sıfrlyq daǵdylardy damytýǵa aýdarylady. Jyl sońyna deıin kásibı standarttarmen 600 jumysshy kásibin qamtý josparlanýda.
Úkimet derekterine sáıkes, jyl basynan beri 475 myńnan astam qazaqstandyq jumyspen qamtyldy. Elektrondyq eńbek bırjasynda 800 myńnan astam bos oryn bar.
İs-shara qorytyndysy boıynsha Prezıdent Qasym-Jomart Toqaevtyń atynan 37 adam marapattaldy: 18 adam «Qurmet» ordenimen, ekeýi «Eńbek dańqy» III dárejeli ordenimen, taǵy 17 adam «Eren eńbegi úshin» medalimen marapattaldy. Marapattalǵandar arasynda júrgizýshiler, mashınıster, tokarlar, slesarlar, ınjenerler, mehanızatorlar, áleýmettik qyzmetker jáne jattyqtyrýshy bar. Olardyń eńbek ótili 15 pen 53 jyl aralyǵynda.
Buǵan deıin «Kýrsıv» 2026 jyly Qazaqstanda 547,7 myń adamdy jumyspen qamtý josparlanyp otyrǵanyn jazǵan bolatyn.