Enrıke Iglesıastyń Almatydaǵy konsertinde tártipti eki myńǵa jýyq polısıa qyzmetkeri qamtamasyz etedi. Ol 5 qyrkúıekte, senbi kúni Ortalyq stadıonda ótedi. Quqyq qorǵaý organdary kúsheıtilgen jumys rejımine kóshedi, dep habarlaıdy infohub.kz saıty.
Tártip saqshylary sport nysanynyń aýmaǵynda da, oǵan irgeles kóshelerde de kezekshilik etedi. Kórermenderdi kirgizý 16:00-de bastalady. Negizgi kireberister Abaı dańǵyly men Baıtursynov kóshesi jaǵynan ashylady. VIP Standing sanatyndaǵy bılet ıeleri úshin Sátpaev kóshesi jaǵynda jeke kireberis qarastyrylǵan.
Konsert aıaqtalǵannan keıin birneshe baǵyt boıynsha qosymsha shattldar jiberiledi: áýejaıǵa, Orbıta shaǵyn aýdanyna, Almaty-1 vokzalyna, Raıymbek dańǵyly — Alataý kóshesine, sondaı-aq «Almaty Arenaǵa».
Stadıonǵa kirer aldynda barlyq kórermender tekserýden ótedi. Kelýshilerden is-shara erejelerimen aldyn ala tanysyp, tyıym salynǵan zattardy alyp kelmeý suralady. Sondaı-aq polısıa qyzmetkerleri men baqylaýshylardyń talaptaryn oryndaý qajet.
Almaty ákimdigi kórermenderdi stadıonǵa aldyn ala kelýge shaqyrady, bul adamdardyń kóp jınalýyn boldyrmaýǵa jáne konserttiń basyna keshikpeýge múmkindik beredi.