Ortalyq komýnıkasıalar qyzmetinde ótken brıfıńte 2026 jylǵy negizgi Ulttyq biryńǵaı testileýdiń (UBT) qorytyndysy shyǵaryldy. Testileý 10 mamyrdan 10 shildege deıin ótti, dep habarlaıdy infohub.kz saıty.
Qazaqstan Respýblıkasy Ǵylym jáne joǵary bilim mınıstrliginiń málimetinshe, testileýge 233 myń talapker qatysty. Eki múmkindikti eskergende, UBT 422 myń ret tapsyryldy. Onyń ishinde 73,1% talapker qazaq tilinde, 26,8% – orys tilinde, al 0,16% (383 adam) – aǵylshyn tilinde tapsyrdy.
Eń suranysqa ıe beıindik pánder kombınasıalary «Matematıka-Fızıka», «Bıologıa-Hımıa» jáne «Shyǵarmashylyq emtıhan» boldy.
Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıtetiniń tóraıymy Gúljan Jarasova: «Injenerlik baǵyttarǵa degen qyzyǵýshylyqtyń joǵary bolýy, sońǵy jyldary prezıdenttiń tapsyrmasy boıynsha memlekettik bilim granttarynyń basym bóliginiń dál osy salalarǵa bólinýimen baılanysty», – dep atap ótti.
Onyń aıtýynsha, 2026 jyly UBT formaty ózgerissiz qaldy: talapkerler úsh mindetti jáne eki beıindik pándi tapsyrdy. Maksımaldy nátıje – 140 bal, testileý uzaqtyǵy – 4 saǵat.
Qazir memlekettik bilim granttaryn taǵaıyndaý konkýrsyna qatysý úshin qujattar qabyldaý jalǵasýda. Qujattardy 20 shildege deıin (sonyń ishinde) joǵary oqý oryndarynyń qabyldaý komısıalaryna (onyń ishinde vırtýaldy) nemese eGov.kz portaly arqyly tapsyrýǵa bolady.
Qatysý úshin jeke kýálik, UBT sertıfıkaty, bilimi týraly qujat, fotosýret jáne (bar bolsa) jeńildik sanattary boıynsha qatysý quqyǵyn rastaıtyn qujattardy usyný qajet. Memlekettik bilim granttarynyń ıegerleriniń tizimi 10 tamyzǵa deıin jarıalanady.