Eýropalyq Odaq 16 jasqa tolmaǵan balalardyń áleýmettik jelilerdi paıdalanýyn shekteýdi kózdeıtin josparyn jarıalady. Bul qadam balalardyń ál-aýqatyn jaqsartyp, ınternettegi qaýipsizdikti qamtamasyz etýge baǵyttalǵan, dep habarlaıdy infohub.kz saıty.
Jospar boıynsha, balalardyń áleýmettik jelige kirýine birtindep kóshý qarastyrylǵan. Atap aıtqanda, 13 jasqa tolmaǵandarǵa platformalarǵa kirýge tolyq tyıym salynady.
Al 13 pen 15 jas aralyǵyndaǵy jasóspirimder platformalarǵa táýligine bir saǵat qana kire alady. Ol úshin ata-anasynyń nemese qamqorshysynyń áleýmettik jelidegi akkaýnty arqyly ashylǵan «shaǵyn akkaýnttar» paıdalanylady.
Eýropalyq komısıa áleýmettik jeli kompanıalary óz platformalarynyń bastapqy jobasynan-aq qaýipsiz ekenin dáleldeýi tıis ekenin málimdedi. Eýropalyq Odaq basshysy Ýrsýla fon der Láıen bul qadam «ata-analardy basqarý tizginine qaıtarady» dep atap ótti.
Onyń sózinshe, «EO balalar týraly akt» dep atalǵan zańnama ata-analarǵa «balalaryna qaýipsiz álemde jol tabýǵa kómektesetin quraldardy» beredi.
Atalǵan aktige sáıkes, tek 15 jasqa tolǵan balalar ǵana ózderiniń jeke áleýmettik jeli akkaýnttaryn asha alady.
Ýrsýla fon der Láıen buǵan deıin Eýropadaǵy balalar úshin áleýmettik jelige «kidirtý» engizýdi usynǵan bolatyn. Ol mamyr aıynda «áleýmettik jelige eń tómengi jas shegin belgileý týraly talqylaýdy endi elemeýge bolmaıdy» degen edi.
Beısenbi kúni resmı túrde jarıalanǵan bul saıasat sársenbi kúni EO basshysynyń Eýropalyq parlamentte sóılegen jyldyq baıandamasynda da aıtylǵan bolatyn.
Keıbir jekelegen EO elderi, sonyń ishinde Fransıa men Ispanıa, balalardyń áleýmettik jelige kirýin shekteý jóninde ózderiniń jeke josparlaryn jarıalap úlgerdi.