Eýropalyq odaqqa múshe on segiz memleket mıgranttar aǵynyna qarsy biryńǵaı mehanızm qurýǵa kelisti, dep habarlaıdy infohub.kz saıty.
Jańa sharalar týraly Bild basylymy málimdedi. Olardy qabyldaý máselesi Seýtadaǵy daǵdarystan keıin týyndaǵany atap ótildi, alaıda kezdesýde Ispanıa ókilderi bolmady. Eýropa sońǵy oqıǵalardan keıin syrtqy shekaralarynda mıgranttardyń kenetten aǵylýyna daıyndalmaq.
Germanıanyń ishki ister mınıstri Aleksandr Dobrındt jáne EO-nyń ishki ister men mıgrasıaǵa jaýapty taǵy 17 mınıstri osyndaı mıgrasıalyq daǵdarystarǵa jaýap berýdiń jalpyeýropalyq mehanızmin ázirleýdi kózdep otyr.
Basylym dereginshe, mınıstrler úsh tarmaqtan turatyn josparǵa kelisti. Birinshisi — syrtqy shekaralardaǵy jaǵdaıdy tótenshe dep tanýǵa múmkindik beretin EO úshin biryńǵaı ólshemderdi engizý. Ekinshi tarmaqqa sáıkes, daǵdarys týyndaǵan jaǵdaıda mıgranttardy jedeldetip shyǵarýǵa bolady. Úshinshi tarmaq syrtqy shekarada daǵdarysqa tap bolǵan EO eline 24 saǵat ishinde Frontex jedel áreket etý kúshterin jiberýge múmkindik beretin qoldaý mehanızmin qurýdy kózdeıdi.
Buǵan deıin 30-31 shildege qaraǵan túni myńdaǵan marokkolyq mıgrant Soltústik Afrıkadaǵy Ispanıanyń Seýta eksklavyndaǵy shekarany buzǵany habarlanǵan — Ispanıa bıligi áskerdi jumyldyrdy.
Ispanıa bıligi juma kúni keshke qaraı mıgranttardyń kópshiligi Seýtadan ketip, Marokkoǵa oralǵanyn atap ótti. Bastapqyda shekaralyq qorshaý ornatylǵan qabyrǵa arqyly jaǵaǵa shyǵýǵa tyrysqandaǵy qysylysta keminde 57 mıgrant qaza tapqany, olardyń deneleri sýdan alynǵany habarlanǵan.
Sonymen qatar Marokko İİM mıgranttardyń Ispanıaǵa basyp kirýine ne sebep bolǵanyn túsindirdi. Bolǵan jaǵdaı jalǵan aqparatpen baılanystyryldy.
Keıinirek Marokkolyq mıgranttar Ispanıadan bosqyn mártebesin berýdi talap etti. Olar óz talaptaryn usynyp, narazylyq aksıasyn ótkizdi.