Eýropalyq Odaq Ýkraınadaǵy qaqtyǵysqa baılanysty Reseıge qarsy 21-shi shekteý sharalary paketin engizdi. Bul týraly Eýropalyq Keńestiń saıtynda habarlandy, dep habarlaıdy infohub.kz saıty.
Jańa paket Reseı ekonomıkasyna jáne onyń Ýkraınaǵa qarsy soǵys áreketterin qarjylandyrý qabiletine barynsha áser etetin salalarǵa qatań ekonomıkalyq sanksıalardy qamtıdy. Sondaı-aq 48 jeke tulǵa men 170 uıymǵa qatysty sanksıalar engizildi. 94 bank pen iri qarjy mekemeleriniń aktıvterin toqtatý jáne olarǵa qarajat berýge tyıym salý qarastyrylǵan.
Grýzıa, Panama, Birikken Arab Ámirlikteri, Marshall araldary, Qyrǵyzstan jáne Belarýste tirkelgen 14 krıptovalúta platformasy shekteýge ilikti. EO 2027 jylǵy 15 shildege deıin reseılik munaıǵa baǵa tóbesi mehanızmin avtomatty túrde túzetýdi toqtata turady.
Sondaı-aq reseılik «kóleńkeli flotqa» qarsy sanksıalar keńeıtildi — sanksıalyq tizimge taǵy 41 keme qosyldy, nátıjesinde sanksıalanǵan kemelerdiń jalpy sany 673-ke jetti. EO áskerı-ónerkásip keshenin qoldaǵany úshin qosarlanǵan maqsattaǵy taýarlar men tehnologıalarǵa qatań eksporttyq shekteýler qoldanylatyn tizimge 51 jańa uıymdy qosty.
«Osy uıymdardyń keıbireýleri úshinshi elderde (Qytaı, onyń ishinde Gonkong, Úndistan, Qazaqstan, Qyrǵyzstan, Túrkıa jáne Birikken Arab Ámirlikteri) ornalasqan jáne Reseıdiń eksporttyq shekteýlerdi aınalyp ótýine yqpal etedi, sonyń ishinde mıkroelektronıka, sandyq baǵdarlamalyq basqarylatyn stanoktar jáne jartylaı ótkizgishterdi óńdeýge arnalǵan jabdyqtar boıynsha», — delingen málimdemede.
Jańa paket Ýkraınaǵa qarsy urys qımyldaryna qatysqan reseılik qarýly kúshter men basqa da qurylymdardyń áskerı qyzmetshileri men burynǵy áskerı qyzmetshilerine vıza berýge tolyq tyıym salýdy engizý úshin quqyqtyq negiz jasaıdy. Bul sharanyń kúshine enýi týraly túpkilikti sheshimdi EO Keńesi keıinirek qabyldaıdy. Keıbir taýarlarǵa eksporttyq jáne ımporttyq shekteýler engiziledi.