Túrkıa prezıdenti Rejep Taıyp Erdogan Shanhaı yntymaqtastyq uıymy (SHYU) samıtinen oralǵan saparynda Batys elderimen baılanysty úzbeı, Shyǵyspen qarym-qatynasty nyǵaıtýdy jalǵastyratynyn málimdedi. Bul týraly infohub.kz saıty habarlaıdy.
Qyrǵyzstanda ótken samıt barysynda Erdogan Reseı prezıdenti Vladımır Pýtınmen ekijaqty kezdesý ótkizip, ıadrolyq yntymaqtastyq máselelerin talqylady. Prezıdenttik ushaqta jýrnalıserge bergen suhbatynda Erdogan Túrkıanyń SHYU-ǵa tolyq múshe bolý maqsatyn qaıtalady. Uıymǵa qazirgi ýaqytta Reseı, Qytaı, Úndistan jáne Iran kiretin on memleket múshe.
«Men ásirese Túrkıanyń uıymǵa múshelik perspektıvasy qandaı da bir bloktan bólinýdi nemese Batysqa arqasyn burýdy bildirmeıtinin atap ótkim keledi», — dedi prezıdent.
Ýkraınadaǵy soǵysqa toqtalǵan Erdogan Ankaranyń Máskeý men Kıevpen dostyq qarym-qatynasty saqtap otyrǵanyn aıtyp, «Reseı men Ýkraına arasyndaǵy soǵystyń múmkindiginshe tezirek beıbit aıaqtalýy» ekeýiniń de ortaq úmiti ekenin jetkizdi.
Sondaı-aq ol Qara teńizdegi azamattyq keme qatynasyna tónip turǵan qaýipterge baılanysty teńiz qaýipsizdiginiń mańyzdylyǵyn atap ótti. «Qara teńizde komersıalyq teńiz tasymalynyń qaýipsizdigin turaqty qamtamasyz etetin mehanızm qajet», — dedi Erdogan, astyq daǵdarysynyń qaıtalanbaýyna jol bermeý «paıdaly» bolatynyn qosyp aıtty.
2022 jyly Túrkıanyń deldaldyǵymen jasalǵan astyq kelisimi Ýkraına porttaryn ashyp, Reseıdiń azyq-túlik pen tyńaıtqysh eksportyna jol bergen edi. Bir jyldan keıin Pýtın bas tartqan bul kelisim álemdik azyq-túlik jetkizilimi úshin, ásirese Afrıka, Taıaý Shyǵys jáne Azıa elderi úshin mańyzdy bolǵan.
2001 jyly qurylǵan SHYU-ǵa qazir Qazaqstan, Qyrǵyzstan, Tájikstan, Ózbekstan, Pákistan jáne Belarýs te kiredi. Bul uıym AQSH-tyń jahandyq yqpalyna qarsy tepe-teńdik retinde sıpattalady, degenmen onyń maqsattary men baǵdarlamalary áli de naqty emes.