Qazaqstandyq taý-ken óndirý holdıńi ERG óziniń brazılıalyq BAMIN enshiles kompanıasyn portýgalıalyq Mota-Engil-ge satý boıynsha kelissózderdiń sońǵy satysynda tur, dep habarlaıdy infohub.kz.
Latynamerıkandyq bıznes-platforma BNamericas-tyń málimetinshe, Mota-Engil Bahia Mineração (BAMIN) kompanıasyn satyp alý týraly aldyn ala kelisimge qol qoıyp, keshendi tekserý prosesin bastaǵan. Kelisim jyldyń birinshi jartyjyldyǵynyń sońyna deıin jasalady dep kútilgen edi, biraq ERG-degi aksıonerlerdiń aýysýy kelissózderdi keshiktirdi.
Basylym derekkózi kelissózderdiń qazir aıaqtalý satysynda ekenin, kelisimsharttarǵa tekserý júrgizilip jatqanyn atap ótti. Kelisimge aldaǵy eki aı ishinde qol qoıylýy múmkin. Qol qoıylǵan jaǵdaıda ERG eýropalyq kompanıaǵa Baıa shtatyndaǵy Pedra-de-Ferro temir kenishin óndirý jobasyn beredi. ERG saıtynda bul joba álemdegi eń joǵary sapaly jáne eń az qospaly temir ken oryndarynyń biri ekeni kórsetilgen.
Sonymen qatar, Mota-Engil ERG-diń ornyna FIOL transkontınentaldi temirjoly men Portý-Sýl kópfýnksıonaldy tereń sý portynyń qurylysymen aınalysady. BAMIN jobalary shamamen 5 mlrd dollar kóleminde ınvestısıany qajet etedi dep kútilýde. Basylymda Brazılıa úkimeti Mota-Engil men ERG arasyndaǵy kelissózderdi jedeldetý úshin tikeleı kúsh salyp jatqany da atap ótilgen.
«Kýrsıv» basylymy ERG-ge túsinikteme alý úshin júginip, jaýap kútýde. Buǵan deıin Bloomberg agenttigi derekkózderge silteme jasap, ERG aksıonerleri topty qazaqstandyq jáne halyqaralyq baǵyttarǵa bólip qaıta qurylymdaý múmkindigin qarastyryp jatqanyn habarlaǵan bolatyn. Mundaı talqylaýlardy jeke aksıonerler Shuhrat Ibragımov pen Shahmurat Mutalıp júrgizýde.
Esterińizge sala keteıik, ERG – Qazaqstandaǵy eń iri taý-ken óndirý holdıńi, onyń Qazaqstanda, Kongo Demokratıalyq Respýblıkasynda jáne Brazılıada mys, kоbált, alúmını jáne basqa metaldardy óndirý jobalary bar. 2026 jylǵy mamyrda ERG qazaqstandyq kásipker Shahmurat Mutalıpke tıesili Nature Energy Solutions Ltd. kompanıasy taý-ken tobynyń 39,3% aksıasyn satyp alǵanyn habarlady. Paket Patoh Shodıevten (18,6%) jáne Aleksandr Mashkevıchtiń muragerlerinen (20,7%) satyp alyndy. ERG-tiń taǵy 20,7% Ibragımovtar otbasyna tıesili, al 40% aksıa Qazaqstan Respýblıkasy Qarjy mınıstrliginiń enshisinde.