Eurasian Resources Group (ERG) ımportty almastyrý baǵdarlamasynyń qorytyndysyn shyǵardy. Baǵdarlama el ishindegi qundylyqty arttyrýǵa jáne Memleket basshysy men Qazaqstan Respýblıkasy Úkimetiniń tapsyrmalary aıasynda otandyq óndirýshilerdi qoldaýǵa baǵyttalǵan. 2025 jyly toptyń jalpy kólemi 1,8 trln teńge bolatyn satyp alýynyń 1,32 trln teńgesi qazaqstandyq óndiristiń taýarlary, jumystary men qyzmetterine tıesili boldy, dep habarlaıdy infohub.kz saıty.
Sońǵy birneshe jylda ERG kásiporyndary 55,7 mlrd teńgege 74 ofteık-kelisimshart jasasyp, qazaqstandyq óndirýshilerge óndiris ashý men keńeıtý úshin qajetti kepildi ótkizý naryǵyn qamtamasyz etti. Eń iri kelisimsharttar qatarynda: jabdyqtar men temirjol tehnıkasyna qosalqy bólshekter óndirýge 12,3 mlrd teńge, jarý quraldaryn bastaýǵa 8,4 mlrd teńge, elektr peshi transformatorlaryna 5,7 mlrd teńge, rotorlyq ekskavatorlarǵa shómishterge 2,5 mlrd teńge, sorǵylarǵa qosalqy bólshekterge 1,4 mlrd teńge.
Sonymen qatar, ERG otandyq óndirýshilermen jalpy somasy 196 mlrd teńgege 951 uzaq merzimdi shart jasasty. Toptyń satyp alýlaryndaǵy qazaqstandyq taýarlardyń úlesi 52%-dan 63%-ǵa ósti.
«Memleket basshysynyń tapsyrmasy biz úshin uran emes, óndiristik jospar. El ishindegi qundylyqtyń árbir paıyzynyń artynda Qazaqstanda qalatyn naqty zaýyttar, jumys oryndary men tehnologıalar tur. Biz otandyq óndirýshilerge jylyna júzdegen mıllıard teńge kólemindegi naryq ashtyq – jáne Qazaqstanda óndirýge daıyndarǵa tapsyrystarǵa kepildik berýge ázirmiz», – dedi ERG-niń Qazaqstandaǵy bas dırektory Qudrat Shamıev.
Baǵdarlamany aýqymdy túrde júzege asyrýdyń bir mysaly – «ERG Service» JSHS 2025 jyly 94,3 mlrd teńgege ónim men qyzmet óndirisin jergiliktendirdi: energetıkalyq jáne taý-ken kólik jabdyqtaryn jóndeý, quıý jáne mashına jasaý óndirisi. Buǵan qosa, Qazaqstanda alúmınıdi qaıta óńdeýdi damytý úshin ERG otandyq qorytpa óndirýshilerge metaldy London metal bırjasynyń (LME) kotırovkalarynan 5% tómen baǵamen jetkizedi.
Búginde ERG-niń ımportty almastyrý baǵdarlamasy qazaqstandyq óndirispen almastyrýǵa ashyq 21 myń ımporttyq pozısıany qamtıdy: karerlik avtoshınalar men ekskavator shómishterinen bastap transformatorlar men ónerkásiptik hımıaǵa deıin. Kez kelgen qazaqstandyq óndirýshi erg.kz jáne torgi.erg.kz alańdaryndaǵy «Importty almastyrý» bóliminde baǵdarlamaǵa qatysýǵa ótinim bere alady. Kompanıada ótinimdi taldap, sheshim shyǵarady. Oń sheshim bolsa, taýar óndirýshimen shart nemese ofteık-kelisimshart jasalady.
ERG baǵdarlamany birneshe baǵytta damytýdy josparlap otyr: top kásiporyndarynda jetkizýshiler úshin toqsan saıyn «ashyq esik kúnderin» ótkizý, memlekettik organdarmen kezdesýler uıymdastyrý, sondaı-aq Qazaqstannyń Damý bankimen jáne ekinshi deńgeıli banktermen birlesip ofteık-kelisimsharttardy qarjylandyrý tetikterin pysyqtaý (QR «Ónerkásiptik saıasat týraly» Zańyna sáıkes).