Ertis ózeniniń biryńǵaı sıfrlyq pasporty paıda bolýy múmkin. Osyndaı bastamany Pavlodarda ótken halyqaralyq forýmda Shyǵys Qazaqstan oblysynyń ákimi Nurymbet Saqtaǵanov usyndy, dep habarlaıdy infohub.kz saıty.
«Ertis ózeniniń biryńǵaı sıfrlyq pasporty» jańartylyp otyratyn aqparattyq júıede sý tereńdigi men sapasy, jaǵalaý jaǵdaıy, balyq qory, keme júzetin ýchaskeler jáne gıdrotehnıkalyq qurylystar týraly derekterdi biriktirýi tıis. Jańa júıeniń arqasynda óńirler tasymaldaýdy, túp tereńdetý jumystaryn jáne port ınfraqurylymyn josparlaý kezinde naqty derekterdi paıdalana alady.
Júıe qurý úshin Shyǵys Qazaqstan oblysynyń ákimi birlesken jumys tobyn qurýdy usyndy. Onyń quramyna Qazaqstan men Reseıdiń memlekettik organdary, óńirleri jáne ǵylymı uıymdary kirýi múmkin.
Sonymen qatar forýmda Zaısan kóliniń jaǵasyndaǵy Tuǵyl aýylynda salynatyn jańa port tanystyryldy. Joba ázirge pysyqtaý satysynda tur. Oǵan negiz bolatyn — qazirgi aılaq, qoımalar jáne uzyndyǵy 99 shaqyrymdyq Tuǵyl – Maıqapshaǵaı temir joly.
Jańa port arqyly qum, granıt, qıyrshyq tas jáne bentonıt tasymaldaý josparlanyp otyr. Tasymal kólemi bir navıgasıada úsh mıllıon tonnadan asýy múmkin, alaıda ony júk jóneltýshilermen áli kelisip, baǵyttardyń ekonomıkasyn esepteý qajet.
Buǵan deıin «Kýrsıv» Qazaqstan, Qytaı jáne Reseıdiń Ertis ózenin birlesip paıdalaný jóninde úshjaqty konsýltasıalar ótkizýdi pysyqtap jatqanyn jazǵan. Sarapshylar sý jáne ekologıalyq qaýipsizdikti arttyryp, energetıkalyq ınfraqurylymdy damytýǵa kómektesetin is-qımyl josparyn quryp qoıdy.