Qazaqstan, Reseı jáne Qytaı transshekaralyq Ertis ózenin birlesip paıdalaný máseleleri boıynsha úshjaqty konsýltasıalar ótkizý múmkindigin pysyqtap jatyr. Bul týraly «Rossıskaıa gazetaǵa» bergen suhbatynda Reseı Federasıasynyń tabıǵı resýrstar jáne ekologıa mınıstri Aleksandr Kozlov málimdedi, dep habarlaıdy «Interfaks», infohub.kz saıtyna silteme jasap.
Reseıdiń tabıǵat qorǵaý vedomstvosy basshysynyń aıtýynsha, Reseı-Qazaqstan birlesken jumys toby Ertis ózenin sý sharýashylyǵy jáne sý-energetıkalyq maqsatta paıdalaný jobasyn daıyndaýdy qolǵa alǵan. Sarapshylar sý jáne ekologıalyq qaýipsizdikti arttyrýǵa, sondaı-aq energetıkalyq ınfraqurylymdy damytýǵa baǵyttalǵan is-sharalar josparyn qurdy.
«Taraptar árqaısysynyń jaýapkershilik aımaǵyn aıqyndap, jumystardy egjeı-tegjeıli sıpattaıtyn, oryndalý merzimderi men ár kezeńniń qunyn kórsetetin kúntizbelik kesteni daıyndady», — dedi Kozlov.
Mınıstr sondaı-aq Qytaıdy tarta otyryp, jobany úshjaqty formatta damytýdyń aıtarlyqtaı áleýeti bar ekenin atap ótti.
«Qazir Ertis boıynsha yntymaqtastyq perspektıvalaryn talqylaý úshin beıindi mınıstrlikter deńgeıinde úshjaqty konsýltasıalar ótkizý múmkindigin pysyqtap jatyrmyz», — dep naqtylady ol.
Buǵan deıin «Kýrsıv» Qazaqstan men Reseı transshekaralyq Ertis ózenin birlesip basqarý, sondaı-aq onda týrızm men basqa da baǵyttardy damytý nıetin bekitetin arnaıy hattamaǵa qol qoıǵanyn habarlaǵan. Yntymaqtastyq jospary ekonomıka men aýyl sharýashylyǵynan bastap sport, sıfrlandyrý jáne jastar saıasatyna deıingi 30-dan astam salany qamtıdy.