Jetisý oblysynda sıntetıkalyq esirtki satýmen aınalysqan uıymdasqan toptyń segiz boljamdy múshesi ustaldy, dep habarlaıdy infohub.kz saıty.
Bas prokýratýranyń baspasóz qyzmetiniń málimetinshe, Jetisý oblysynda Qazaqstan Respýblıkasynyń aýmaǵynda sıntetıkalyq esirtki zattaryn zańsyz satýmen aınalysqan uıymdasqan toptyń qyzmeti toqtatyldy. Jedel-izdestirý is-sharalary barysynda segiz boljamdy qatysýshy ustaldy.
Qylmystyq is materıaldaryna sáıkes, qylmystyq áreket shetelden úılestirilgen. Uıymdastyrýshy sıntetıkalyq esirtki zattarynyń jetkizilýin qamtamasyz etip, top músheleriniń arasynda rólderdi bólip, jasyryn oryndardyń koordınattaryn jiberip, qylmystyq tapsyrmalardyń oryndalýyn baqylap, sondaı-aq krıptovalúta arqyly esep aıyrysýdy júzege asyrǵan.
Aldyn ala anyqtalǵandaı, top músheleri uıymdastyrýshynyń nusqaýy boıynsha Taldyqorǵan, Almaty, Qonaev, Qaskeleń jáne Pavlodar qalalarynyń aýmaǵynda jasyryn oryndar jabdyqtaǵan.
Tergeý jáne jedel is-sharalar barysynda quramynda sıntetıkalyq esirtki zaty «mefedron» bar dep boljanǵan untaq tárizdi zat salynǵan býmalar, sot saraptamasyna jiberilgen basqa da zattar, dáleldemelik máni bar aqparaty bar uıaly telefondar, sondaı-aq Exodus krıptovalúta ámıany arqyly esep aıyrysý týraly málimetter alyndy.
Anyqtalǵan barlyq faktiler boıynsha Qazaqstan Respýblıkasy Qylmystyq kodeksiniń 297-babyna sáıkes qylmystyq ister tergelýde.
Uıymdastyrýshynyń jeke basyn, onyń ornalasqan jerin, esirtki zattaryn jetkizý arnalaryn, sondaı-aq quqyqqa qarsy áreketke qatysy bar basqa da adamdardy anyqtaýǵa baǵyttalǵan tergeý jáne jedel-izdestirý is-sharalary júrgizilýde. Sotqa deıingi tergep-tekserýdiń barysy Jetisý oblysy prokýratýrasynyń baqylaýynda.