Qazaqstanda estý apparattaryn alý múmkindigi keńeıtilýde: endi olardy estý qabileti buzylǵan pasıentter medısınalyq kórsetilimder boıynsha, tipti múgedektigi bolmasa da ala alady. Jańa mehanızmdi Densaýlyq saqtaý mınıstrligi ázirledi, dep habarlaıdy infohub.kz saıty.
Vedomstvo barlyq uıymdastyrý sharalary aıaqtalǵannan keıin bul kómekti el boıynsha myńdaǵan pasıent paıdalana alatynyn ýáde etedi.
Osy ýaqytqa deıin estý apparattary tek aýyr estý buzylystary bar múgedektiktiń jekelegen sanattaryna tegin beriletin. Endi olardy alý quqyǵyna sýrdolog dáriger estý protezdeýin taǵaıyndaǵan barlyq pasıent ıe bolady.
«Estý reabılıtasıasyn erte bastaý ómir sapasyn saqtaýǵa, oqý, qarym-qatynas jáne áleýmettik beıimdelý múmkindikterin jaqsartýǵa kómektesedi», — dep atap ótti Densaýlyq saqtaý mınıstrliginiń Ana men bala densaýlyǵyn qorǵaý departamenti dırektorynyń mindetin atqarýshy Janar Sadýova.
Estý apparatyn alý úshin pasıent sýrdologqa tekserýden ótýi qajet. Dáriger estý qabiletiniń tómendeý dárejesin baǵalaıdy, qolaıly úlgini tańdaıdy jáne medısınalyq qorytyndy resimdeıdi.
Jańa júıe tek estý apparatyn berýdi ǵana emes, sonymen qatar qurylǵyny jeke tańdaý men baptaý, qulaqqa arnalǵan vkladysh jasaý, pasıentti oqytý, sondaı-aq kepildik jáne kepildikten keıingi qyzmet kórsetýdi qamtıdy.
Densaýlyq saqtaý mınıstrliginiń dereginshe, ártúrli qýattaǵy, estý qabiletiniń ártúrli dárejedegi joǵalýy bar pasıentterge arnalǵan zamanaýı estý apparattarynyń tizimi qazirdiń ózinde qalyptastyrylǵan.