Bıngemton ýnıversıtetiniń (AQSh) mamandary gıppokamp — este saqtaýǵa jaýapty mı bóligi — jumysyndaǵy alǵashqy aqaýlar 30 jastan keıin paıda bolatynyn anyqtady. Bul jańalyq este saqtaý problemalary tek qartaıǵanda ǵana týyndaıdy degen burynǵy túsinikti joqqa shyǵarady. Zertteý nátıjeleri Cerebral Cortex jýrnalynda jarıalandy, dep habarlaıdy infohub.kz saıty.
Eksperıment barysynda ǵalymdar 18 ben 74 jas aralyǵyndaǵy 60-qa jýyq eriktiniń mıyna fýnksıonaldy MRT jasady. Qatysýshylarǵa ártúrli zattar men fondyq sýrettermen birge adamdardyń fotosýretteri kórsetildi. Keıingi este saqtaý testinde 30 ben 50 jas aralyǵyndaǵy adamdar tanys betti qate zatpen baılanystyryp, jıi qatelesti. Olar bul sýretterdi kórgenderin esine saqtady, biraq bastapqy jupty dál qaıta shyǵara almady.
Zertteý avtorlary bul áserdi estelikterdi kodtaýǵa, nyǵaıtýǵa jáne qaıta shyǵarýǵa jaýapty mı aımaǵy — gıppokamptaǵy aqaýlarmen baılanystyrady. Buǵan deıin egde jastaǵy adamdardaǵy mundaı qatelikter gıppokamp belsendiliginiń tómendeýinen bolady dep eseptelgen edi. Alaıda tomografıa kerisinshe kórsetti: egde jastaǵy top qateleskende gıppokamp joǵary belsendilik tanytyp, naqty bólshekterdi emes, tek jalpy konteksti qaıta jańǵyrtty.
Psıhologıa kafedrasynyń dosenti Ian Makdonoý orta jas este saqtaý fýnksıalary úshin mańyzdy ótpeli kezeń ekenin atap ótti. Ǵalymdar kognıtıvti buzylýlardyń aldyn alý joldaryn tabý úshin dál osy jas tobyn odan ári zertteý qajettigin aıtady.