2030 jylǵa qaraı Eýropa qyzmet merzimi aıaqtalatyn 1 mıllıonnan astam elektromobıl akýmýlátoryn qaıta óńdeý máselesine tap bolýy múmkin. Sarapshylar qazirdiń ózinde tıisti ınfraqurylymdy damytýǵa shaqyryp otyr, dep habarlaıdy infohub.kz saıty.
Álemde elektromobıl satylymy ósip keledi. Olardyń úlesi jańa kólikterdiń álemdik naryǵynyń tórtten birin qurap otyr, al tek 2026 jyldyń birinshi jartyjyldyǵynda Eýropada 1,24 mıllıonnan astam elektrkólik satyldy – bul ótken jylmen salystyrǵanda 33,7 paıyzǵa artyq.
Alaıda bunymen qatar jaqyn arada qaıta óńdeýdi qajet etetin batareıalar sany da artyp keledi. Halyqaralyq energetıkalyq agenttiktiń dereginshe, aldaǵy tórt jylda shamamen 1,2 mıllıon akýmýlátor qaldyqqa aınalýy múmkin. 2040 jylǵa qaraı olardyń sany 14 mıllıonǵa jetýi yqtımal.
Lıtı-ıondy batareıalardy qaıta óńdeýge bolady, biraq bul proses áli de qymbat jáne tehnologıalyq turǵydan kúrdeli. Eýropada akýmýlátorlardy bólshekteýdi avtomattandyrýǵa, qundy materıaldardy alýdy qazirgi 50 paıyzdan 90-95 paıyzǵa deıin arttyrýǵa jáne batareıalardyń bir bóligin qaıta paıdalanýǵa – mysaly, energıa jınaqtaý júıelerinde – múmkindik beretin tehnologıalar ázirlenýde.
«Elektromobılder kómirtegi shyǵaryndylary az ekonomıkaǵa kóshýde mańyzdy ról atqarady, biraq olardyń uzaq merzimdi tabysy qaldyqtar aǵynyn qanshalyqty tıimdi basqaratynymyzǵa baılanysty», – dep atap ótti Valpak kompanıasynyń ókili Djeıms Skıfmor.
Akýmýlátorlardy qaıta óńdeý máselesi Qazaqstan úshin de birtindep ózekti bola túsýde. Buǵan deıin elimizde avtobýstardy qosqanda shamamen 21 myń elektromobıl tirkelgeni habarlanǵan bolatyn. Ázirge olardyń kópshiligi batareıalardyń qyzmet merziminiń aıaqtalýynan alys, biraq park ósken saıyn akýmýlátorlardy qaýipsiz qaıta óńdeý jáne olardaǵy materıaldardy qaıta paıdalaný mańyzdylyǵy arta túspek.