Eýropadaǵy orman órtteri men anomaldy ystyqtyń ekonomıkalyq shyǵyny 2026 jyldyń basynan beri 3 mlrd eýrodan asty, dep habarlaıdy infohub.kz.
Financial Times gazeti tabıǵı apattardyń saldaryn taldaı kele, Eýropa elderindegi orman órtteri men anomaldy ystyqtyń ekonomıkalyq shyǵyny 2026 jyldyń basynan beri 3 mlrd eýrodan asqanyn anyqtady. Maqalanyń aýdarmasyn RIA Novostı keltirdi.
«Fransıany, Ispanıany jáne Eýropanyń basqa da aımaqtaryn sharpyǵan orman órtteri men anomaldy ystyq kezeńderi bıylǵy jyly 3 mıllıard eýrodan astam shyǵyn keltirdi», — dep jazady basylym.
Financial Times baǵalaýynsha, órt qaýpi maýsymynyń alǵashqy eki aıynda ot shamamen 500 myń gektar jerdi joıdy. Eýroaımaqtyń eń kóp zardap shekken bes eli úshin ǵana shyǵyn 3,1 mlrd eýrony quraıdy.
Gazet túpkilikti shyǵyn somasy aıtarlyqtaı joǵary bolýy múmkin ekenin atap kórsetedi. «Jyljymaıtyn múlikke, aýyl sharýashylyǵyna jáne týrızm salasyna keltirilgen zalal áli de eseptelýde», — delingen jarıalanymda.
Eń kóp zardap shekken elder qatarynda Ispanıa, Portýgalıa, Fransıa, Italıa jáne Grekıa bar.
Buǵan deıin Fransıa prezıdenti Emmanýel Makron el Ekinshi dúnıejúzilik soǵys aıaqtalǵannan beri eń kóp tabıǵı órtke tap bolǵanyn málimdegen edi.
Buǵan deıin biz Fransıa men Ispanıany sharpyǵan iri órtter týraly jazǵanbyz. Ispanıadaǵy orman órti 12 adamnyń ómirin qıdy. Fransıa prezıdenti Emmanýel Makron basqa memleket basshylarynan kómek surady. Odan buryn biz Fransıa bıligi eldiń ońtústik-batys jaǵalaýyndaǵy Kap-Ferre múıisinen turǵyndardy tolyq evakýasıalaý týraly buıryq bergenin jazǵanbyz. Ondaǵan myń turǵyn men týrıske qaýip tónip tur.